मुलीचा तलावात बुडूण मृत्यू; हत्या की आत्महत्या पोलीस घेत आहेत शोध

पेण शहरातील मोतीराम तलावात एक तरुणी बुडाल्याची घटना आज सकाळी घडली. तरूणीची हत्या झाली की तिने आत्महत्या केली,याचा पोलीस शोध घेत आहेत.

रायगड : पेण शहरातील मोतीराम तलावात एक तरुणी बुडाल्याची घटना घडली. आज सकाळी ही घटना घडली. कोमल वाघमारे रा. फणस डोंगरी असे मृत तरुणीचे नाव आहे. अग्निशमन दल व पोलिसांनी मुलीचा मृतदेह बाहेर काढला आहे. मात्र या घटनेनंतर तिची आई सुरेखा वाघमारे (४८) ही सुद्धा बेपत्ता झाली आहे. त्यामुळे कोमल हिने आत्महत्या केली की, तिची हत्या झाली असा प्रश्न निर्माण झाला आहे.

पेण शहरातील मोतीराम तलावामध्ये एक तरुणी बुडल्याची माहिती अग्निशमन दलाला समजल्यानंतर अग्निशमन दल घटनास्थळी दाखल झाले. अग्निशमन दलाच्या जवानांनी शोध मोहीम सुरू केली. मात्र मुसळधार पाऊस सुरू असल्याने तलाव काठोकाठ भरला आहे. त्यामुळे कोमलचा मृतदेह शोधण्यात अडचण येत होती. काही वेळाने कोमल हिचा मृतदेह पाण्यावर आल्यानंतर जवानांनी तो बाहेर काढला. उत्तरीय तपासणीसाठी मृतदेह पेण उपजिल्हा रुग्णालयात नेण्यात आला. या घटनेची माहिती वाघमारे यांच्या घरी दिली असता कोमल हिची आई सुरेखा वाघमारे या सुद्धा बेपत्ता असल्याचे पोलिसांना समजले. त्यामुळे या प्रकरणाचे गूढ वाढले असून, त्यादृष्टीने पोलिस पुढील तपास करत आहेत.