रायगड - पूरग्रस्त मिरज भागात मुस्लिम बांधवांकडून गावाची आणि मंदिराची स्वच्छता करण्यात आली आहे. महापूरामुळे सांगली, कोल्हापूर जिल्हयात अनेक गावे पाण्याखाली गेली होती. जाती पातीच्या भिंती ओलांडून पूरग्रस्तांसाठी सर्व स्तरीतून मदतीचा ओघ सुरू झाला. रायगड जिल्ह्यातील जमियेते उलमा हिंद श्रीवर्धन मुस्लिम संघटनेतर्फे पूरग्रस्तांना मदतीचा हात देण्यात आला आहे. मुस्लिम संघटनेतर्फे दहा लाखाची आर्थिक मदत, जीवनावश्यक वस्तू तसेच औषधोपचार यांची मदत केली. यावेळी मिरज येथील कृष्णा नदीच्या काठावर असलेल्या गावाची आणि मंदिराची स्वच्छता करून धार्मिक एकोप्याचा संदेश दिला आहे.
अतिवृष्टीने सांगली, कोल्हापूर, मिरज जिल्ह्यात पूरस्थिती निर्माण झाली. पुरामुळे येछील जनजीवन उध्वस्त झाले. अनेकांचे संसार बुडाले, जनावरे वाहून गेली, काही जण मृत्युमुखी पडले. कोल्हापूर सांगली मधील पूरस्थिती निवळल्यानंतर या ठिकाणी घाणीचे साम्राज्य निर्माण झाले आहे. घरांमध्ये चिखल, माती साचली आहे. मंदिरे आणि गावातही मोठ्या प्रमाणात चिखल, कुजलेले धान्य पसरले होते. मुस्लिम बांधवांनी गावातील व मंदिरातील कचरा, चिखल काढून स्वच्छता केली.
रायगड जिल्ह्यातील श्रीवर्धन येथील मुस्लिम बांधव कोल्हापूर, सांगली येथील पूरग्रस्त भागात मदत वाटप करीत असताना, मिरज मधील एका गावात मंदिराची पुरामुळे दुर्दशा झाली होती. मंदिराच्या परिसरात चिखल साचला होता. अशा वेळी मुस्लिम बांधवांनी जाती पातीचा भेद बाजूला सारून मंदीरात साचलेला चिखल काढून मंदिर स्वच्छ केले. त्याचप्रमाणे गावातही स्वच्छता केली.
जमियते उलमा हिंद व अंजुम ने दर्दमंदान म्हसळा- श्रीवर्धन विभाग तसेच श्रीवर्धन व म्हसळा तालुक्यातील अनेक मुस्लिम जमातीने संघटित होऊन दहा लाखची रक्कम जमा केली गेली. या मुस्लिम संघटनांनी कोल्हापूर-सांगली, मिरजला जाऊन पूरग्रस्तांसाठी अन्न धान्य व कपड्याचे वाटप केले. तर काही पूरग्रस्तांना आर्थिक मदत व तेथील नागरिकांची डॉक्टरांकडून तपासणीही केली.
नैसर्गिक आपत्तीमुळे जाती पातीच्या भिंती नष्ट होऊन प्रत्येकाने आपल्या परीने मदतीचा हात पुढे केला आहे. मंदिराची स्वच्छता करून मुस्लिम बांधवांनी समाजापुढे आदर्श निर्माण केला आहे. जमियेते उलमा हिंद संघटनेचे उपाध्यक्ष मौलाना अमनुल्लाह बुरूड, जमियेते उलमा हिंद श्रीवर्धन विभागाचे तालुका अध्यक्ष काजी मोहम्मद हुसेन माहीमकर, मुफ्ती म्हामूद मोमीन, मौलाना मलिक कोतवाल, मौलाना रिहान करदमे, मौलाना हाकीम काळोखे, रिजवान चिविलकर यांनी पुढाकार घेऊन हे कार्य पूर्ण केले.
