पुणे - तीन सराईत चोरट्यांना वानवडी पोलिसांनी ताब्यात घेतले आहे. पोलीस तपासात त्यांनी जबरी चोरी, घरफोडी, वाहनचोरी अशाप्रकारचे १० गुन्हे केल्याचे कबूल केले आहे. त्यांच्याकडून ५ लाख ८७ हजारांचा मुद्देमाल हस्तगत करण्यात आला आहे.
घरफोडीच्या १० गुन्ह्यांची उकल
खबऱ्यांनी दिलेल्या गुप्त माहितीनुसार वानवडी पोलिसांनी ही कारवाई केली. ओंकार विनोद मासाळ उर्फ हर्षद सलीम शेख (वय २०), किरण उर्फ जॉय मॅनवल (वय २१) आणि स्वप्नील नागनाथ बोधले (वय १९) अशी अटक करण्यात आलेल्या तरुणांची नावे आहेत. आरोपी सराईत चोरटे असून त्यांच्यावर यापूर्वीही गुन्हे दाखल आहेत.
हे तिघे दुचाकी चोरून घरफोडी करत असत. घरफोडी झाल्यानंतर दुचाकी मध्येच सोडून पसार होत असत. त्यांनी वानवडी, कोंढवा, हडपसर, मार्केटयार्ड, खडक, शिक्रापूर, जामखेड या परिसरात चोऱ्या केल्याचे कबूल केले.
