पुणे - पुण्यातील नवले पुलावर रविवारी रात्री भीषण अपघात ( Accident on Navale bridge in Pune ) झाल्याची माहिती समोर आली आहे. या अपघातामध्ये किमान ३० गाड्यांचे नुकसान झाल्याची माहिती मिळते आहे. या अपघाताची माहिती मिळताच पोलिस, अग्निशमन दलाच्या गाड्या घटनास्थळी दाखल झाल्या आहेत. या अपघातात ( Navale Bridge Accident ) अनेक जण जखमी झाल्याची प्राथमिक माहिती मिळत आहे.
अपघातात 30 गाड्यांचे नुकसान - या भीषण अपघातात 30 गाड्यांचे नुकसान झाले आहे. या अपघाताची माहिती मिळताच पीएमआरडीए अग्निशमन दलाच्या गाड्या घटनास्थळी दाखल झाल्या. सध्या त्यांच्याकडून बचावकार्य युद्धपातळीवर सुरू आहे.नर्हे परिसरात अपघात झाला आहे. घटनेची माहिती मिळताच सिंहगड पोलीस घटनास्थळी दाखल झाले.
गाड्या एकमेकांवर आदळल्याची माहिती - कंटेनरच्या धडकेने या सर्व गाड्या एकमेकांवर आदळल्याची माहिती आहे. या अपघातात एकूण 47 गाड्यांचे नुकसान झाल्याचे सांगण्यात येत आहे. या अपघातात अद्याप कोणतीही जीवितहानी झाल्याचे वृत्त नाही. मात्र, येथील नेमकी माहिती लवकरच समोर येईल. त्यानंतरच आर्थिक नुकसान व जीवितहानी याचा अचूक अंदाज बांधता येईल.
सूत्रांनी दिलेल्या माहितीनुसार, या अपघातात अनेक गाड्यांचे नुकसान झाले असून 50 ते 60 जण जखमी झाले आहेत. अपघातात जखमी झालेल्या प्रवाशांना जवळच्या रुग्णालयात दाखल करण्यात आले आहे. मात्र, प्रशासनाकडून अद्याप कोणतीही अधिकृत माहिती देण्यात आलेली नाही. ( Navale Bridge Accident )
कसा घडला अपघात : नवले ब्रीजवर कडाक्याच्या थंडीत रविवारी मालवाहू ट्रकने अक्षरश: अपघाताचे तांडवच केले. भरधाव वेगाने येणाऱ्या ट्रकच्या (क्रमांक एपी टीई 5858 ) चालकाचा ट्रकवरील ताबा सुटल्याने तेथून जाणाऱ्या एकेका वाहनाला उडवत अजस्त्र ट्रक पुढे जात होता. अनेक कार खेळण्याप्रमाणे चिरडून टाकत पुढे जाणारा हा ट्रक 40 हून अधिक कार आणि रिक्षांचा चेंदामेंदा करून थांबला. तेव्हा अनेक वाहनांतून जखमींचा आक्रोश ऐकू येत होता. काही कळायच्या आत ट्रक चालकाने घटनास्थळावरून पळून गेला. भिषण आवाजाने संपूर्ण नवले ब्रिज हादरला. ते पाहून तेथून जाणाऱ्या वाहनचालकांनी हातातली वाहने सोडून अपघात ग्रस्तांकडे धाव घेतली. चेंदामेंदा झालेल्या कारमधून गंभीर जखमींना काढण्याची घाई सुरू झाली. यात चार जण गंभीर जखमी झाले असून त्यांना जवळच्या खासगी रुग्णालयात दाखल करण्यात आले. तर दहापेक्षा जास्त लोकांना जबर मार लागला (Vehicles collided head on on Navle Bridge) आहे.
अपघाताची मुख्यमंत्र्यांकडून दखल : पुणे येथे नवले ब्रिजवर रात्री टँकरच्या धडकेने अनेक वाहने दुर्घटनाग्रस्त होऊन झालेल्या अपघाताविषयी मुख्यमंत्र्यांनी पोलिसांकडून माहिती घेतली आहे. हा अपघात कुणाच्या निष्काळजीपणामुळे झाला, तेही तपासण्याचे निर्देश मुख्यमंत्र्यांनी दिले आहेत. तसेच अपघातातील जखमींना योग्य ते उपचार मिळण्याची व्यवस्था करण्याच्या सूचना देखील त्यांनी प्रशासनाला दिल्या आहेत. अपघातामुळे या भागात मोठ्या प्रमाणावर झालेली वाहतूक कोंडी दूर करून वाहनधारकांना त्रास होणार नाही, हे पाहण्याचे निर्देश देखील त्यांनी दिले आहेत. नवीन कात्रज बोगद्यापासून सुरु होणारा तीव्र उतार हा गेल्या काही वर्षांपासून मृत्युचा स्पॉट बनला आहे. गेल्या काही वर्षांपासून सातत्याने या रस्त्यांवर अपघात होत असून या अपघातात मृत्यूचे प्रमाण देखील वाढले (Vehicles collided head on on Navle Bridge in Pune) आहे.
