पुणे - मौजमजा करण्यासाठी दुचाकी चोरी करणाऱ्या 2 अल्पवयीन चोरांना भोसरी पोलिसांनी अटक केली आहे. या चोरांकडून 1 लाख 78 हजार रुपये किमतीच्या 5 दुचाकी हस्तगत करण्यात आल्या आहेत. याप्रकरणी अल्पवयीन मुलांना ताब्यात घेतले असून भोसरी पोलीस ठाण्यातील 2 आणि दौंड पोलीस ठाण्यातील 1 असे एकूण 3 गुन्हे यामुळे उघडकीस आले आहेत.
पोलिसांनी दिलेल्या माहितीनुसार, भोसरी पोलीस ठाण्याच्या हद्दीत अंकुशराव लांडगे नाट्यगृहाजवळ मैदानात 2 चोर येणार आहेत, अशी भोसरी पोलिसांना मिळाली होती. त्यानुसार वरिष्ठ पोलीस निरीक्षक शंकर अवताडे यांच्या मार्गदर्शनाखाली अधिकाऱ्यांनी सापळा रचून 2 अल्पवयीन मुलांना ताब्यात घेतले.
हेही वाचा - पुण्यात गुरुवारी 'नो होंकिंग डे'
त्यांच्याकडे असलेल्या दुचाकीबाबत चौकशी केली असता, त्यांनी उडवाउडवीची उत्तरे दिली. दोन्ही चोरट्यांना पोलीस ठाण्यात आणून कसून चौकशी केली. त्यावेळी त्यांनी त्यांच्याकडे असलेली दुचाकी चोरी केल्याचे सांगितले. तसेच पिंपरी-चिंचवड, पुणे आणि दौंड येथून एकूण 5 दुचाकी चोरल्याचे त्यांनी सांगितले. त्यानुसार, पोलिसांनी 1 लाख 78 हजार रुपये किमतीच्या 5 दुचाकी जप्त केल्या आहेत. घटनेचा अधिक तपास भोसरी पोलीस करत आहेत.
हेही वाचा - सोनसाखळी चोरी करणारा पदवीधर आरोपी जेरबंद; साडेआठ लाख रुपयांचे सोने जप्त
ही कारवाई पोलीस वरिष्ठ पोलीस निरीक्षक शंकर आवताडे यांच्या मार्गदर्शनाखाली सहाय्यक पोलीस निरीक्षक सिद्धेश्वर कैलासे, पोलीस कर्मचारी गणेश हिंगे, आशिष गोपी, सुमित देवकर, समीर रासकर, संतोष महाडिक, विकास फुले, सागर जाधव, संदीप जोशी, सागर भोसले यांच्या पथकाने केली.