Sushma Andhare Reaction : सत्तेपुढे शहाणपण चालत नाही, सुषमा अंधारेंचा राणेंना चिमटा

आमदार नितेश राणेंविरोधात मध्यरात्रीपासून पुण्यातील बंडगार्डन पोलीस स्टेशनच्या बाहेर तृतीय पंथी समाजाच्या वतीने रास्ता रोको आंदोलन करण्यात आले. यावेळी पोलिसांकडून या तृतीय पंथींची धरपकड करण्यात आली. यावर शिवसेनेच्या नेत्या सुषमा अंधारे यांनी आपले मत व्यक्त करत, सत्ताधारी भाजप शिंदे सरकार आणि राणे यांच्यावर टीका केली आहे.

पुणे : आमदार नितेश राणे यांनी तृतीय पंथीयांबाबत केलेल्या अवमानजनक व्यक्तव्याबद्दल राणे यांच्यावर गुन्हा दाखल करण्याची मागणी करण्यात येत आहे. नितेश राणे यांनी उद्धव ठाकरे यांच्यावर टीका करताना केलेल्या ट्विटमध्ये तृतीयपंथीयांचे प्रमुख असे म्हटले होते. यावर आता तृतीयपंथीयांनी आक्रमक भूमिका घेतली आहे.

तृतीय पंथीयांना टार्गेट करणे अशोभनीय : सुषमा अंधारे म्हणाल्या की, सत्तेच्यापुढे शहाणपण चालत नाही. त्यामुळे सत्ताधाऱ्यांना कोणावर गुन्हा दाखल करायचा कोणावर नाही हे त्यांनी ठरवले आहे. आज विरोधकांवर खोटे गुन्हे दाखल केले जात आहेत. पण जिथे सत्य घटना आहे तिथे मात्र गुन्हा दाखल होत नाही. हे पाहता गृहमंत्र्यांनी त्यांची सर्व शक्ती विरोधकांना नामोहरम करण्यासाठी लावली आहे. आता जे सुरू आहे ते पाहता निलेश, नितेश राणे आपल्या संस्काराचा परिचय देत आहेत. त्यांचे अभिनंदन आहे, ते त्यांचे संस्कार दाखवत आहेत. असे असताना तृतीयपंथीयांना टार्गेट करणे अशोभनीय आहे.