बारामती उपप्रादेशिक परिवहन कार्यालयात 'सिम्युलेटर मशीन' कार्यान्वित

रस्त्यावरील अपघातांचे प्रमाण कमी करण्यासाठी आणि वाहन चालवण्याचा परवाना मिळवण्याच्या एका महत्वाच्या मशीनची निर्मिती करण्यात आली आहे .त्या मशीनचे नाव 'सिम्युलेटर मशीन' ( Simulator machine ) आहे. ही मशीन बारामती उपप्रादेशिक परिवहन कार्यालयात ( Baramati Sub-Regional Transport Office ) कार्यान्वित करण्यात आली आहे. परिवहन विभागाकडून राज्यातील बहुतांश आरटीओ कार्यालयांना 'सिम्युलेटर मशीन' देण्यात आली आहे.

पुणे : जिल्ह्यातील बारामती, इंदापूर, दौंड हे तीन तालुके राजकीय, सामाजिक, शैक्षणिक व औद्योगिक क्षेत्रातील महत्त्वाचे तालुके आहेत. या तीन तालुक्यातील वाहनधारकांच्या सोयीसाठी बारामती येथे उपप्रादेशिक परिवहन कार्यालयाची उभारणी ( Establishment of Baramati Sub-Regional Transport Office ) करण्यात आली आहे. या तीनही तालुक्यात मोठ्या प्रमाणात वाहनधारक आहेत. या तीनही तालुक्यात शिकाऊ वाहनधारकांना वाहन चालवण्याचा परवाना मिळवण्यासाठी प्रत्यक्षात वाहनांची ट्रायल देण्याआधी 'सिम्युलेटर' मशीनचा ( Simulator machine ) उपयोग केल्यास शिकाऊ चालकाला प्रत्यक्ष वाहन चालवताना मदत होते.

अपघाताचे प्रमाण कमी होण्यास होणार मदत -
शिकाऊ वाहन चालकांना वाहन चालवण्याचा परवाना मिळविण्यासाठी त्याला रहदारीच्या रस्त्यावर ट्रायल घ्यावी लागते. अनेकदा अशा ट्रायलमुळे अपघात होतात. रस्त्यावरील अपघातांचे प्रमाण कमी करण्यासाठी परिवहन विभागाने आरटीओ कार्यालयामार्फत 'सिम्युलेटर' मशीनचा उपक्रम राबविण्यास सुरुवात केली आहे. या मशिनद्वारे सहा किमीचे अंतर पार करायचे आहे. या अंतरात रस्त्यावरील चढ-उतार, वळण आहेत. तसेच अनपेक्षितपणे एखादे दुसरे वाहन आडवे आल्यास आपले वाहन तात्काळ कसे थांबवावे. इत्यादीचा सराव या मशीनद्वारे शिकाऊ वाहनचालकांना करता येणार आहे.

अशी आहे 'सिम्युलेटर मशीन' -

'सिम्युलेटर मशीन' ही एक विशिष्ट प्रकारचे मशीन आहे. या मशिनद्वारे व्हिडिओ गेम प्रमाणे वाहन चालविण्याचा वाहनचालकाला अनुभव घेता येणार आहे. या मशीन मध्ये चारचाकी वाहना प्रमाणेच स्टेरिंग, स्पीडोमीटर, बटन, हॉन, साईड इंडिकेटर अशा प्रकारची या मशीनची रचना आहे. तसेच वाहनाच्या काचे प्रमाणे चालका समोर काच असते. या काचेच्या बाहेर रस्त्यावरील विविध दृश्य निर्माण केले जातात. त्यामुळे या 'सिम्युलेटर मशीन' मध्ये बसलेल्या वाहनचालकाना वाहन चालवताना प्रत्यक्षात वाहन चालवत असल्याचा आभास निर्माण होतो.

लवकरच भारतीय वाहनांच्या रचनेप्रमाणे बदल -

सध्या सिम्युलेटर मशीन मध्ये विदेशातील वाहनांप्रमाणे रचना आहे. जसे विदेशात वाहनाच्या डाव्या बाजूला वाहन चालक बसतो. तसेच या मशीनद्वारे डाव्या बाजूला बसल्याचा भास होतो. मात्र लवकरच या मशीनमध्ये भारतीय वाहनांच्या रचनेप्रमाणे बदल करण्यात येणार आहे. त्यासाठी आयआयटी मुंबईची मदत घेतली जाणार आहे.

'सिम्युलेटर मशीन' द्वारे सराव करण्याचे आव्हान -

शिकाऊ वाहनचालक जेव्हा ट्रायलसाठी येतात. तेव्हा काहींना एखादे वाहन चालविताना आत्मविश्वास नसतो. अशावेळी 'सिम्युलेटर मशीन' द्वारे सराव केल्यास त्यांना प्रत्यक्ष वाहन चालविताना उपयोग होणार आहे. बारामती, इंदापूर, दौंड येथील वाहनधारकांना वाहन परवान्यासाठी प्रत्यक्ष ट्रायल देण्याआधी येथील 'सिम्युलेटर मशीनवर' सराव करण्याचे आव्हान, उपप्रादेशिक परिवहन अधिकारी नंदकिशोर पाटील व सहाय्यक प्रादेशिक परिवहन अधिकारी राजेंद्र केसकर यांनी केले आहे.