पुणे - शिवसेनेचे ज्येष्ठ नेते आणि राज्यसभा खासदार संजय राऊत पुणे दौऱ्यावर आहेत. आपल्या दौऱ्यादरम्यान पुणे पत्रकार संघात त्यांचा वार्तालाप आयोजित करण्यात आला होता. यावेळी त्यांनी अभिनेत्री कंगना रणौत, अर्णब गोस्वामी याबरोबरच निवडणूक आयोगावरही निशाणा साधला. तसेच पंतप्रधान नरेंद्र मोदी आणि मुख्यमंत्री उद्धव ठाकरे यांच्यात चागंला संवाद आहे, असेही त्यांनी स्पष्ट केले. तर बिहार निवडणुकीबाबत बोलताना राष्ट्रीय जनता दलाचे तेजस्वी यादव यांची प्रशंसा केली.
राऊत कंगनाविषयी काय म्हणाले?
कंगना आता गुन्हेगार आहे, संशयित आहे. तिला समन्स पाठवले आहेत, तिने मुंबई पोलिसांसमोर हजर व्हावे, असे सांगून ती शूर मुलगी आहे, असं मला वाटायचं, असा टोला त्यांनी कंगनाला लगावला आहे.
अर्णब गोस्वामीबद्दल -
मुख्यमंत्र्यांचा उल्लेख एकेरी करणे कितपत योग्य आहे. मी त्या चॅनलचं नाव घेणार नाही, त्यांची तेवढी त्याची लायकी नाही, असे सांगत राऊत यांनी थेट त्यांच्या पात्रतेवरच प्रश्नचिन्ह उपस्थित केलं. तसेच निवडणूक आयोगही भाजपाची ब्रँच आहे. तर, मी काय बोलणार? त्यांच्याकडून काय अपेक्षा करणार, असे म्हणत निवडणूक आयोगावर निशाणा साधला.
हेही वाचा - 15 दिवसांत सरकार पडेल अशा पैजा लावल्या, पण... - संजय राऊत
बिहार निवडणुकीवर राऊत काय म्हणाले?
देशाचे नाही जगाचे लक्ष बिहारकडे आहे. या निवडणुकीबाबत लोकांच्या मनात निःपक्षपातीबद्दल शंका आहे. एक तरुण मुलगा या देशातल्या राजसत्तेला आव्हान देत हजारो लाखोंच्या सभा घेत आहे, तेजस्वी यादव मुख्यमंत्री झाले तर, आश्चर्य वाटणार नाही, असे राऊत म्हणाले.
मोदी ठाकरे यांच्यात चांगला संवाद -
मोदी आणि ठाकरे यांच्यात चांगला संवाद आहे. पण राज्यात ज्या पद्धतीने पहिल्या दिवसापासून जी भूमिका विरोधी पक्षाने घेतली आहे, ती लोकशाहीला योग्य नाही. फडणवीसांच्या ध्यानीमनी नसताना सत्ता गेली, अजूनही त्यांना धक्का पचवता आलेला नाही, असे राऊत यांनी सांगितलं.
