पुणे Pune Crime News : पिंपरी चिंचवडच्या अमली पदार्थ विरोधी पथकानं रुग्णवाहिकेमधून गांजा विक्री करणाऱ्या आरोपींना गजाआड केलं आहे. पकडण्यात आलेल्या आरोपींकडून 1 कोटी 31 लाखांचा तब्बल 96 किलो गांजा जप्त करण्यात आला आहे. पोलिसांनी केलेल्या या कारवाईत दोन रुग्णवाहिका, चार मोबाईल आणि एक कार जप्त करण्यात आली आहे. कृष्णा मारुती शिंदे, अक्षय बारकू मोरे, हनुमंत भाऊसाहेब कदम, देवी प्रसाद उर्फ देवा सिताराम डूकळे, सनीदेवल सिद्धार्थ शर्मा, सनीदेवल भगवानदास भारती आणि सौरव निर्मल या आरोपींना पोलिसांनी अटक केली आहे. आरोपी हे पिंपरी-चिंचवडच्या चिखली परिसरात रुग्णवाहिकेतून सौरव निर्मल यास गांजा विक्री करणार होते, अशी माहिती पोलिसांनी दिली आहे.
रुग्णवाहिकेतून तस्करी होणारा गांजा : अमली पदार्थ विरोधी पथकाचे सदानंद रुद्राक्षे आणि रणधीर माने यांना खबऱ्यानं माहिती दिली होती. त्या माहितीवरुन अमली पदार्थ विरोधी पथकानं रावेत पोलीस स्टेशनच्या हद्दीत म्हस्के वस्ती इथं कृष्णा मारुती शिंदे (वय 27 वर्षे, रा. शिंदेवस्ती, शितपूर, ता. कर्जत, जि. अहमदनगर) अक्षय बारकु मोरे (वय 29 वर्षे, रा. कान्होबा वस्ती, पाटेगाव, ता. कर्जत जि. अहमदनगर), हनुमंत भाऊसाहेब कदम (वय 35 वर्षे, रा. कुसडगाव, एस.आर.पी.एफ. सेंटर जवळ, ता. जामखेड, जि. अहमदनगर) यांना ताब्यात घेतलं. त्यांच्याकडं 30 लाख 55 हजार 700 रूपये किंमातीचा गांजा पकडण्यात आला. त्यामध्ये 25 लाख 69 हजार 100 रुपये किंमतीचा 25 किलो 691 ग्रॅम गांजा, एक सफेद रंगाची शेवरे कार क्रमांक एमएच 14 सीडब्ल्यु 0007, 04 मोबाईल आणि 1 हाजर 600 रुपये रोख रक्कम असा माल जप्त केला. त्यांनी हा गांजा देवी प्रसाद उर्फ देवा सिताराम डुकळे (वय 32 वर्षे रा. उंडेगाव ता. परांडा, जि. धाराशिव) यांच्याकडून आणल्याची माहिती दिली. हा गांजा ते सौरव निर्मल याला विकणार असल्याचं त्यांनी सांगितल्यानं त्यांच्याविरुध्द रावेत पोलिसात गुन्हा दाखल करण्यात आला.
रुग्णावाहिका जप्त : या गुन्ह्याच्या तपासात पोलिसांनी आरोपी देवी प्रसाद उर्फ देवा सिताराम डुकळे याला तांत्रिक विश्लेषणावरुन उंडेगाव धाराशिव येथून ताब्यात घेतलं. त्याच्याकडं 50 लाख 20 हजारांचा 50 किलो 200 ग्रॅम गांजा जप्त करण्यात आला. हा गांजा ते सौरव निर्मल (रा. रुपीनगर, चिखली, पुणे) याला विकण्यासाठी आणल्यानं आणि आरोपी रुग्णवाहिकेमधून गांजा वाहतूक करत असल्याचं तपासात निष्पन्न झालं. याप्रकरणी पोलिसांनी आरोपीला ताब्यात घेवून त्याच्याकडं असलेल्या दोन रुग्णवाहिका जप्त करण्यात आल्या.
उत्तर प्रदेशातून आणला गांजा : अमली पदार्थ विरोधी पथकानं दुसरी कारवाई महाळुंगे एमआयडीसी पोलीस ठाण्याच्या हद्दीत केली. पोलीस अमलदार विजय दौंडकर आणि प्रसाद कलाटे यांना मिळालेल्या माहितीवरून पोलिसांनी सन्नीदेवल सिद्धनाथ शर्मा (वय 21), सन्नीदेवल भगवानदास भारती (वय 23, दोघे रा. कुरुळी, ता. खेड. मूळ रा. उत्तर प्रदेश) यांना कुरुळी इथून ताब्यात घेतलं. त्यांच्याकडून 20 लाख 79 हजार 600 रुपये किमतीचा 20 किलो 196 ग्रॅम गांजा आणि दोन मोबाईल फोन जप्त केले. आरोपींनी हा गांजा उत्तर प्रदेश येथून राजेश कुमार (रा. घोरावल, जि. सोनभद्र, उत्तर प्रदेश) याच्याकडून आणला असल्याचं तपासात समोर आलं आहे.
1 कोटी 31 लाखांचा मुद्देमाल : अमली पदार्थ विरोधी पथकानं दोन मोठ्या कारवाया करत 96 किलो 87 ग्रॅम गांजा, एक कार, दोन रुग्णवाहिका, मोबाईल फोन, रोख रक्कम असा एकूण एक कोटी 31 लाख 55 हजार 300 रुपयांचा मुद्देमाल जप्त केला आहे. गांजा विक्री करणारे आणि खरेदी करणारे अशा सर्व आरोपींना अटक करून अमली पदार्थ विरोधी पथकानं ही साखळी नष्ट केली आहे. ही कामगिरी पोलीस आयुक्त विनयकुमार चौबे, सह पोलीस आयुक्त डॉ. संजय शिंदे, अपर पोलीस आयुक्त वसंत परदेशी, पोलीस उपायुक्त संदीप डोईफोडे, सहायक पोलीस आयुक्त (गुन्हे 1) बाळासाहेब कोपनर यांच्या मार्गदर्शनाखाली अमली पदार्थ विरोधी पथकाचे वरिष्ठ पोलीस निरीक्षक वैभव शिंगारे, सहायक पोलीस निरीक्षक प्रशांत महाले, पोलीस उपनिरीक्षक ज्ञानेश्वर दळवी, राजन महाडिक, पोलीस अमलदार बाळासाहेब सूर्यवंशी, जिलानी मोमीन, प्रदीप शेलार, राजेंद्र बांबळे, दिनकर भुजबळ, संतोष दिघे, मनोज राठोड, संतोष भालेराव, अनिता यादव, विजय दौंडकर, प्रसाद कलाटे, अजित कुटे, प्रसाद जंगीलवाड, रणधीर माने, मितेश यादव, सदानंद रुद्राक्षे, अशोक गारगोटे, कपिलेश इगवे, पांडुरंग फुंदे यांनी केली आहे.
हेही वाचा :
