पुणे - पिंपरी-चिंचवड शहरात गेल्या दहा दिवसांपासून कोरोनाबाधित रुग्णांच्या संख्येत लक्षणीय वाढ झाली आहे. पुणे शहरातही कोरोनाने थैमान घातले आहे. त्यामुळे पिंपरी-चिंचवड शहरात कोरोनाचा सामुदायिक प्रसार होण्याची शक्यता लक्षात घेता पिंपरी-चिंचवड महानगरपालिका क्षेत्रास कंटेनमेंट झोन घोषित केले आहे. शहरात आणखी कडक नाकाबंदी करण्यात येत असून शहराच्या सर्व सीमा व शहरातून बाहेर पडणारे सर्व प्रमुख रस्ते मध्यरात्रीपासून बंद करण्यात आले आहेत. याबाबत पालिका आयुक्त श्रावण हर्डीकर यांनी आदेश दिले आहेत. तर, हे आदेश २७ एप्रिलपर्यंत लागू असतील. त्यानंतर परिस्थिती पाहून पुढील निर्णय घेतला जाईल.
या आदेशातून कोरोना विषाणू प्रतिबंधात्मक उपाय योजनांचे काम करणारे पिंपरी चिंचवड महानगरपालिकेचे, पोलीस विभागाचे, राज्य, केंद्रीय विभागांचे कर्मचारी, वाहने तसेच अत्यावश्यक सेवा देणाऱ्या कर्मचारी आणि वाहनांना वगळण्यात आले आहे. तसेच अत्यावश्यक सेवा आणि वस्तू यांचा पुरवठा करणारी घाऊक वाहतूक सदर आदेशातून वगळण्यात आली आहे.
खालीलप्रमाणे सूचनाही देण्यात आल्या आहेत -
१. नमूद प्रतिबंधित क्षेत्रातील नागरिकांच्या बँकींग सुविधांसाठी सर्व बँकांनी शाखा कार्यालयीन कामकाजाच्या दिवशी सकाळी १०:०० ते ०२:०० या वेळेत सुरू ठेवाव्यात. तसेच आपली एटीएम केंद्रे कार्यान्वीत ठेवावीत.
२. सदर काळात सकाळी १०:०० ते दुपारी ०२:०० या कालवधीतच दूध, भाजीपाला, फळे यांची किरकोळ विक्री सुरू राहील. सदर विक्री मनपा मार्फत दिलेल्या जागांवरच राहिल.
३. सदर काळात अत्यावश्यक इतर सामान जसे अन्नधान्य, जीवनावश्यक वस्तू सकाळी १०:०० ते दुपारी ०२:०० या कालवधीतच सुरू राहतील
४. जीवनावश्यक वस्तुंचे, औषधांचे व तयार अन्न पदार्थांचे घरपोच वाटप सकाळी ८:०० ते रात्री १०.०० या कालवधीतच मनपाच्या पूर्व मान्यतेने पास घेवून करावीत, सदर सुविधेकरता फक्त मनपाच्या अधिकाऱ्याव्दारे निर्गमित करण्यात आलेला पास ग्राह्य धरण्यात येईल.
५. शहरातील सर्व इस्पितळे, रुग्णालये व औषधी दुकाने संपूर्ण कालावधीकरता खुली राहतील.
६. अत्यावश्यक सेवांकरिता यापूर्वी पोलिसांमार्फत देण्यात आलेले पास २२ एप्रिल पर्यंतच लागूर राहतील. यानंतर मनपामार्फत नव्याने पास घेणे संबंधित आस्थापनांना बंधनकारक राहिल. पास देण्यासंदर्भात पिंपरी-चिंचवड मनपामार्फत वेगळ्याने आदेश निर्गमित करण्यात येतील.
७. यापूर्वी मनपामार्फत लागू करण्यात आलेल्या स्थानिक क्षेत्रास 'कंटेनमेंट झोन' म्हणून निश्चित करून सील बंद केलेचे आदेश प्रभावीत क्लस्टर म्हणून पूर्वीप्रमाणेच लागू राहतील
८. शासकीय कार्यालयांना आवश्यक कर्मचाऱ्यांसाठी आवश्यक पास मनपामार्फत उपलब्ध करून दिले जातील. याकरता संबंधित आस्थापनेचे विभाग प्रमुख शासनाच्या निर्देशाप्रमाणे आवश्यक कर्मचाऱ्यांची सूची प्रमाणित करून मनपा कार्यालयास सादर करतील.
९. मोशी कृषि उत्पन्न बाजार समितीबाबत विभागीय आयुक्त, पुणे यांनी पारित केलेले आदेश कायम लागू राहतील. बाजार समितीतील व्यवहारांना सदर आदेशामधून वगळण्यात येत आहे.
१०. सदर काळात मटण व चिकन यांची किरकोळ विक्रीही यापूर्वी मनपाने दिलेल्या आदेश क्र. भूजि/ ०२/कावि/२२०/२०२० दि.१६/०४/२०२० नुसार सकाळी १०:०० ते दुपारी ०२:०० या कालावधीतच सुरू राहतील.
