पुणे - आळंदी हे विवाह करु इच्छितांचे आवडते ठिकाण आहे, असे म्हटले तर वावगे ठरणार नाही. कारण पळून जाऊन लग्न करण्यासाठी, कमी खर्चातील लग्नासाठी किंवा अगदी धूमधडाक्यात होणाऱ्या लग्नांसाठीसुद्धा आळंदी हे प्रसिद्ध असलेले ठिकाण आहे. पण सद्या कोरोनाच्या पार्श्वभूमीवर तीर्थक्षेत्र आळंदीत फक्त स्थानिकांनाच लग्न सोहळा आयोजित करता येणार आहे.
कोरोनाचा समुह संसर्ग रोखण्यासाठी राज्यात चौथा लॉकडाऊन सुरू आहे. या लॉकडाऊनमध्ये शासनाने खबरदारी म्हणून लग्न समारंभास अटी-शर्तीवर ५० व्यक्तींची परवानगी दिली आहे. पण आळंदी येथे स्थानिकांनाच लग्नाची परवानगी असणार आहे. या बाबतचा आदेश प्रांताधिकारी संजय तेली यांनी काढला असल्याची माहिती मुख्याधिकारी समीर भूमकर यांनी दिली.
शासनाने लग्न समारंभास अटींच्या शर्तीवर ५० व्यक्तींची परवानगी दिली आहे. या परवानगीनुसार आळंदीत बाहेरून अनेक लोक वऱ्हाडीसह लग्नासाठी येत आहेत. सद्यघडीला आळंदीत बाहेरून येणाऱ्यांची संख्या किमान अडीच हजाराहून अधिक आहे. यामुळे कोरोनाचा समुह संसर्ग होण्याची शक्यता निर्माण झाली आहे. याची खबरदारी म्हणून शहरात फक्त स्थानिकांनाच विवाह सोहळा तेही घरातच संपन्न करण्यासाठी परवानगी देण्यात आली आहे.
आळंदी होणाऱ्या लग्न समारभातील नववधु आणि वर बाहेरील गावातील असल्यास, त्यांना १४ दिवस क्वारंटाइन करण्यात येणार आहे. या नियमाचे पालन न करणाऱ्यांवर कायदेशीर कारवाई करण्यात येणार आहे.
दरम्यान, आळंदी हे राज्यातील प्रमुख तीर्थक्षेत्र असून याठिकाणी संत ज्ञानेश्वर महाराजांची संजीवन समाधी आहे. त्यामुळे आळंदीत विवाहबद्ध होण्यासाठी अनेकांची इच्छा असते. त्यातच आळंदीत सुमारे पाचशेहून अधिक मंगल कार्यालय, धर्मशाळा व विवाह हॉल आहे. दरवर्षी आळंदीत १ लाखांहून अधिक लग्न होत असतात.
हेही वाचा - आतापर्यंत पुणे विभागातून रेल्वेने 86 हजार 590 प्रवासी परप्रांतात रवाना
हेही वाचा - पुणे विभागात आजअखेर 2 हजार 355 जण कोरोनामुक्त, 248 जणांचा झाला मृत्यू
