भीमाशंकर (पुणे) - बारा ज्योतिर्लिंगांपैकी एक असेलेले श्री क्षेत्र भीमाशंकर मंदिर व परिसरातील पर्यटन कोरोनाच्या पार्श्वभूमीवर मागील एक वर्षापासून बंद असल्याने भीमाशंकर परिसरातील माकडांची व मुक्या प्राण्यांची उपासमार होत होती. अशातच मंचर शहरातील काही युवकांनी सामाजिक बांधिलकी जपत एक घास मुक्या प्राण्यांसाठी ही संकल्पना राबवली. भीमाशंकर परिसरात 1 हजार कलिंगड व 20 कॅरेट केळी माकड व मुक्या प्राण्यांना खाऊ घातली आहेत.
पक्षी व प्राणी मित्रांचा समाजाला नवा आदर्श -
सध्याच्या आधुनिक युगात माणूस माणसाला ओळखायला तयार नाही. आपल्या स्वतःच्या नात्यापेक्षा मुक्या प्राण्यांचा जीव लावला तर ते प्राणी देखील आपल्याला जीव लावतात. भगवान गौतम बुद्धांनी सांगितले आहे की, पशु व पक्षी यांना दिलेले दान सातपटीने लाभ करणारे असते. संपूर्ण जग सध्या कोरोना महामारीच्या वेढ्यात सापडले आहे. माणूस माणसाला ओळखायला तयार नाही. अशा परिस्थितीमध्ये मंचर येथील पक्षी व प्राणी मित्र एकत्र येत समाजाला नवा आदर्श घालून दिला आहे. भीमाशंकर देवस्थान परिसरामध्ये असलेल्या माकडांवर व इतर पशु पक्षांवर उपासमारीची वेळ येऊ नये. यासाठी मंचर येथील युवक वेगवेगळ्या प्रकारचे खाद्य या मुक्या प्राण्यांसाठी दररोज देत आहेत. त्यामुळे लॉकडाऊनच्या काळातही मुक्या प्राण्यांची भूक भागत आहे.
दररोज नित्यनेमाने युवक भागवतात प्राण्यांची भूक -
कोरोनाचा प्रादुर्भाव सुरू झाल्यापासून भीमाशंकर देवस्थान ट्रस्ट येथील मंदिर भाविकांच्या दर्शनासाठी बंद ठेवण्यात आले आहे. भाविकांना दर्शनासाठी मंदिर बंद असल्याने या परिसरात भाविक येत नाहीत. त्यामुळे येथील परिसरात असलेल्या पशु पक्ष्यांची व प्राण्यांची उपासमार होत आहे. ही माकडे जंगल सोडून भीमाशंकर देवस्थान परिसरात असलेल्या बंद दुकानाच्या बाजूला अन्नाच्या व पाण्याच्या शोधात भटकू लागली होती. ही बाब युवकांच्या लक्षात आल्याने त्यांनी सहकाऱ्यांना सोबत घेऊन पशु, पक्षी व प्राणी यांच्यासाठी अन्न व पाण्याची व्यवस्था करण्याचे ठरविले असून दररोज नित्यनेमाने हे युवक प्राण्यांची भूक भागवत आहेत.
हेही वाचा - 'प्रत्येक जिल्ह्यातील मोठ्या गावात 30 बेडचे रुग्णालय सुरू करा'
