PM Narendra Modi : पंतप्रधान मोदींविरोधात सावित्रीबाई फुले विद्यापीठात लिहिला आक्षेपार्ह मजकूर; गुन्हा दाखल करण्याची भाजपाची मागणी

PM Narendra Modi : सावित्रीबाई फुले पुणे विद्यापीठात पंतप्रधान नरेंद्र मोदी यांच्या विरोधात आक्षेपार्ह मजकूर लिहिण्यात आल्याची माहिती समोर आली आहे. या मुद्द्यावरुन भाजपा कार्यकर्ते आक्रमक झाले आहेत. भाजपाचे कार्यकर्ते व नेते आज सावित्रीबाई फुले पुणे विद्यापीठात आंदोलन करण्यात येणार आहे.

पुणे PM Narendra Modi : ऑक्सफर्ड ऑफ युनिव्हर्सिटी अशी ओळख असलेल्या सावित्रीबाई फुले पुणे विद्यापीठात एक धक्कादायक प्रकार घडला आहे. सावित्रीबाई फुले पुणे विद्यापीठाच्या आठ नंबर हॉस्टेलमध्ये पंतप्रधान नरेंद्र मोदी यांच्याविषयी आक्षेपार्ह मजकूर लिहिण्यात आल्याचं सांगितलं जातंय. या विरोधात आज भारतीय जनता पक्षाच्या वतीनं आंदोलन केलं जाणार असल्याची माहिती भाजपाचे शहराध्यक्ष धीरज घाटे यांनी दिली. तर या प्रकरणी विद्यापीठ प्रशासनानं गुन्हा दाखल करावा, अशी अखिल भारतीय विद्यार्थी परिषदेनं मागणी केली.

दोन दिवसांपूर्वी झाला होता वाद : दोन दिवसांपूर्वी सावित्रीबाई फुले पुणे विद्यापीठामध्ये सभासद नोंदणीवरून दोन गटांमध्ये वाद झाला होता. त्यानंतर गुरुवारी (2 नोव्हेंबर) रात्री विद्यापीठाच्या हॉस्टेलमध्ये पंतप्रधान नरेंद्र मोदी यांच्याबद्दल आक्षेपार्ह मजकूर लिहिण्यात आल्याचं समोर आलं. याचे फोटो देखील सोशल मीडियावर व्हायरल होत आहेत. संबधित आक्षेपार्ह मजकूर कुणी लिहिला याचा शोध विद्यापीठाकडून सुरु आहे. दरम्यान, पंतप्रधान नरेंद्र मोदी यांच्याबद्दल भिंतीवर आक्षेपार्ह मजकूर लिहिल्यानं भाजपा कार्यकर्ते आक्रमक झाल्याचं बघायला मिळतंय. या प्रकरणी डाॅ. महेश रघुनाथ दवंगे यांनी चतु:शृंगी पोलीस ठाण्यात फिर्याद दिली आहे. त्यानुसार तक्रार दाखल करण्यात आली. त्यामुळं आता हा वाद वाढण्याची शक्यता आहे.

तापसणी सुरू : हा प्रकार कोणी केला आणि कोणत्या हेतूनं केला याची माहिती मिळवण्यासाठी पोलिसांकडून तपास सुरू करण्यात आलाय. शिवाय 8 नंबरच्या वसतीगृह परिसरातील आणि भितींजवळील सगळे सीसीटीव्ही तपासले जात आहेत.

13 जणांवर गुन्हे दाखल : दरम्यान, सावित्रीबाई फुले पुणे विद्यापीठात स्टुडंट फेडरेशन ऑफ इंडिया आणि अखिल भारतीय विद्यार्थी परिषदेच्या कार्यकर्त्यांमध्ये सभासद नोंदणीवरून हाणामारी झाल्याची घटना घडली. याप्रकरणी दोन संघटनांनी परस्पर विरोधात चतुःशृंगी पोलीस ठाण्यात तक्रार दिली असून 13 जणांवर गुन्हा दाखल करण्यात आलाय. ही घटना ताजी असतानाच आता पंतप्रधानांबद्दल भिंतीवर आक्षेपार्ह मजकूर लिहिल्याचं समोर आल्यानं विद्यापीठ परिसरात एकच खळबळ उडाली आहे.

हेही वाचा -