'आरक्षण मिळुन देखील आंदोलकांवर गुन्हे दाखल होत असतील आरक्षण तर काय कामाचे'

मराठा आरक्षण आंदोलकांवरील गुन्हे त्वरीत मागे घेण्याचे आदेश मुख्यमंत्र्यांनी दिले आहेत. असे असून देखील आंदोलकांवर गुन्हे दाखल करण्याचे सत्र सुरुच आहे. असे असेल तर आरक्षण काय कामाचे असा प्रश्न शिवसेनेचे माजी जिल्हा अध्यक्ष राम गावडे यांनी उपस्थित केला आहे.

पुणे - जिल्ह्यातील चाकण येथील आंदोलनादरम्यान अनेकांवर गंभीर स्वरुपाचे गुन्हे दाखल करण्यात आले होते. सरकारने आता मराठा समाजाला आरक्षण दिले आहे. मात्र, आरक्षण मिळवुन स्वत:चे आणि समाजाचे भविष्य घडविणाऱ्यांवर जर गंभीर स्वरूपाचे गुन्हे दाखल होत असतील, तर हे आरक्षण काय कामाचे? असा प्रश्न शिवसेनेचे माजी जिल्हा अध्यक्ष राम गावडे यांनी पोलीस उपविभागीय आधिकारी यांना पत्र देऊन उपस्थित केला आहे.

आरक्षणाच्या मागणीसाठी एक मराठा लाख मराठा असे म्हणत, मोठ्या संख्येत मराठा समाज एकत्र आला होता. आरक्षणाची मागणी धरून ठेवण्यासाठी चाकण आणि राजगुरुनगर येथे पुणे-नाशिक महामार्गावर आंदोलन करण्यात आले होते. या आंदोलनाला हिंसक वळण लागल्याने शासकिय आणि खाजगी स्वरूपात मोठे नुकसान झाले होते.यानंतर आंदोलकांवर गुन्हे दाखल करण्याचे सत्र सुरु होऊन आंदोलकांची धरपकड सुरु झाली. ही धरपकड आजही सुरुच आहे. मराठा समाजाला आरक्षण मिळुन देखील जर अश्याप्रकारे आंदोलनकाऱयांवर गुन्हे दाखल होत असतील तर हा अन्याय होत आहे अशी भावना शिवसेनेच्या कार्यकर्त्यांनी व्यक्त केली आहे.

पत्रक

मराठा आरक्षण आंदोलकांवरील गुन्हे त्वरीत मागे घेण्याचे आदेश मुख्यमंत्र्यांनी दिले आहेत. असे असून देखील, चाक ण आंदोलनामध्ये सहभागी राष्ट्रवादी कॉग्रेसचे माजी आमदार दिलीप मोहिते पाटील यांच्या अटकेची तयारी पोलीसांकडुन सुरु आहे. याचा निषेध खेड तालुक्यातील गावांमध्ये मराठा समाजाकडुन केला जात आहे. त्यातच आता या आंदोलकांच्या मदतीला शिवसेनाही पुढे आली आहे.