पुणे - राज्यात भाजप आमदार गोपीचंद पडळकर यांच्याविरोधात राजकीय वातावरण चांगलेच तापले आहे. तर, आता पडळकर यांच्या समर्थनार्थ भाजप कार्यकर्तेही पुढे आले आहेत. आज(रविवार) तालुक्यातील उंडवडी येथे पडळकरांच्या प्रतिमेस दुधाचा अभिषेक घालून भाजप कार्यकर्त्यांनी त्यांना समर्थन दिले.
भाजपचे आमदार गोपीचंद पडळकर यांनी शरद पवार यांच्याविषयी आक्षेपार्ह विधान केल्याप्रकरणी राष्ट्रवादीकडून बारामतीत पडळकरांवर गुन्हा दाखल करण्यात आला होता. या प्रकरणी राज्यभरातून राष्ट्रवादीच्या कार्यकर्त्यांकडून निषेध नोंदविला गेला. तर, दुसरीकडे बारामतीत भाजप कार्यकर्त्यांकडून घोषणाबाजी देत पडळकर यांना समर्थन देण्यात आले होते. त्यानंतर आज(रविवार) बारामती तालुक्यातील उंडवडी येथे तालुकाध्यक्ष पांडुरंग कचरे, शहराध्यक्ष सतीश फाळके, जिल्हा सरचिटणीस अविनाश मोटे यांच्यासह गोविंद देवकाते, अ‌ॅड. ज्ञानेश्वर माने, जयराज बागल, विशाल कोकरे, प्रकाश मोरे, प्रमोद खराडे, भाऊसाहेब मोरे व इतर कार्यकर्त्यांच्या उपस्थितीत आमदार पडळकर यांच्या प्रतिमेस दुधाचा अभिषेक घालून त्यांच्या समर्थनार्थ घोषणा देण्यात आल्या.
एकच छंद गोपीचंद, आय सपोर्ट गोपीचंद पडळकर अशा घोषणा देत भाजप कार्यकर्त्यांनी पडळकर यांना समर्थन दिले. या प्रकारानंतर तालुका पोलिसांनी भाजपच्या सहा प्रमुख कार्यकर्त्यांना पोलीस ठाण्यात नेले आहे.
दरम्यान, पंढरपूरमध्ये आयोजित पत्रकार परिषदेत बोलताना गोपीचंद पडळकर यांनी राष्ट्रवादीचे खासदार शरद पवार यांच्यावर वादग्रस्त विधान केले होते. शरद पवार हे महाराष्ट्राला लागलेला कोरोना आहे, असे पडळकर म्हणाले होते. गेल्या अनेक वर्षात महाराष्ट्राचे नेतृत्त्व ते करत आहेत. राज्यातील बहुजनांवर अत्याचार करण्याची त्यांची भूमिका कायम राहिली आहे. ती ते पुढेही चालू ठेवतील. त्यांच्याकडे कोणतीही विचारधारा, अजेंडा, व्हिजन नाही. फक्त छोट्या समूह घटकांना भडकवून आपल्या बाजूने करुन घ्यायचे आणि नंतर त्यांच्यावरच अन्याय करायचे त्यांची भूमिका आहे, असे विधान पडळकर यांना केले होते. यानंतर, राज्यभरातून पडळकर यांच्यावर टीकेची झोड उठली आहे. तसेच, बारामती शहर पोलीस ठाण्यात पडळकर यांच्या विरोधात गुन्हा नोंदवण्यात आला.
