पुणे - काँग्रेसचे नेते सुशीलकुमार शिंदे यांनी त्यांचे वैयक्तिक मत मांडले आहे. मात्र, आम्ही थकलेलो नाही तर जोमाने उभे राहिलो आहोत आणि जोमाने निवडणुकीला सामोरे जात असल्याचे काँग्रेसचे प्रदेशाध्यक्ष बाळासाहेब थोरात यांनी सांगितले.
या निवडणुकीमध्ये आघाडी 160 जागा जिंकेल, असा विश्वास व्यक्त करताना भाजपप्रमाणे अवास्तव बढाया आम्ही मारत नाही, आमच्या आहे त्या जागा डबल होतील एवढा विश्वास नक्की असल्याचे सांगत आघाडीचे सरकार राज्यात येईल, असा विश्वास थोरातांनी व्यक्त केला. ते पुण्यात पत्रकारांशी बोलत होते.
हेही वाचा - जम्मू-काश्मीरमधून ३७० कलम हटवणे हा आमचा श्रद्धेचा विषय
राष्ट्रवादी काँग्रेस आणि काँग्रेस पक्षाच्या अनेक बैठका झाल्या आहेत. मात्र, विलीनीकरणासंदर्भात कुठलाही प्रस्ताव किंवा चर्चा झालेली नाही. विलीनीकरण होणार नाही, असे बाळासाहेब थोरात यांनी स्पष्ट केले. आगामी निवडणुकांसाठी काँग्रेस आघाडीच्या प्रचाराच्या दृष्टिकोनातून काँग्रेसचे वरिष्ठ नेते सोनिया गांधी, राहुल गांधी, प्रियांका गांधी यांच्या प्रचार सभा होणार असल्याचे त्यांनी सांगितले आहे.
