पुणे - राज्यात मागील महिन्यापासून सुरू असलेल्या सत्ता नाट्याने अकल्पनीय वळण घेतले आहे. देवेंद्र फडणवीस यांनी मुख्यमंत्री पदाची आणि अजित पवार यांनी उपमुख्यमंत्री पदाची शपथ घेतली. या दोघांच्या नेतृत्वाखाली राज्याला स्थिर सरकार मिळाले, असे मत हर्षवर्धन पाटील यांनी व्यक्त केले.
भाजपच्या नेतृत्वाखाली जनतेला स्थिर सरकार मिळावे, असा कौल जनतेने निवडणुकीतच दिला होता. मात्र, ऐनवेळी शिवसेनेने माघार घेतल्याने एक महिना होऊन गेला तरी सरकार स्थापन होऊ शकले नाही. शनिवारी सकाळी देवेंद्र फडणवीस यांनी मुख्यमंत्रिपदाची आणि अजित पवार यांनी उपमुख्यमंत्रीपदाची शपथ घेतली आहे. त्यामुळे निश्चितच राज्याला एक स्थिर सरकार मिळाले आहे, असे पाटील म्हणाले.
हेही वाचा - 'महाराष्ट्रात लोकशाहीचा खून, तिघे मिळून सरकारचा पराभव करणार'
राज्यात अवकाळी पाऊस आणि शेतकऱ्यांचे गंभीर प्रश्न यामुळे सरकार स्थापन होने हे जनतेच्याच हिताचे आहे. भविष्यामध्ये नक्की हेच सरकार कायम राहील, असा विश्वास असल्याचेही माजी मंत्री हर्षवर्धन पाटील यांनी सांगितले.
