पुणे - कात्रज प्राणी संग्रहालयातून एक धक्कादायक प्रकार उघडकीस आला. भटक्या कुत्र्यांनी रात्रीच्यावेळी प्राणी संग्रहालयात प्रवेश करुन चार हरणांची शिकार केली. रात्री प्राणीसंग्रहालयात प्रवेश केलेल्या कुत्र्यांनी हरणांचा कळप असलेल्या खंदकात शिरुन दोन नर आणि दोन मादी अशा एकूण चार हरणांची शिकार केली. या कुत्र्यांच्या हल्ल्यात एक हरीण गंभीर जखमी झाले आहे.
चार हरणांचा फडशा
कुत्र्यांनी हल्ला केल्याची माहिती मिळाल्यानंतर प्राणीसंग्रहालयातील सुरक्षारक्षकांनी हरणांचा कळप असलेल्या खंदकाकडे धाव घेतली. परंतु तोपर्यंत या कुत्र्यांनी चार हरणांचा फडशा पाडला होता. त्यानंतर या कुत्र्यांना डॉग स्कॉडच्या मदतीने भूल देऊन पकडण्यात आले आहे.
सुरक्षेचा अभाव
कात्रज गावठाण परिसरातील ओढ्याचे काम सुरू असताना सुरक्षितता न बाळगण्यामुळे हा प्रकार घडला आहे. त्या ठिकाणी फक्त पत्रा लावलेला होता. हा पत्रा उचकटून भटक्या कुत्र्यांनी प्राणी संग्रहालयात प्रवेश केला. त्यांनी जवळच असलेल्या खंदकातील हरणांच्या कळपावर हल्ला चढवला. यात चार हरणांचा जागीच मृत्यू झाला तर एक हरीण गंभीर जखमी झाले आहे.
हेही वाचा - सिडनी कसोटी : नाणेफेक जिंकून ऑस्ट्रेलियाचा फलंदाजीचा निर्णय
