पुणे : मुक्ता टिळक यांचे निधन झाल्यानंतर कसबा पेठ मतदारसंघात पोटनिवडणूक जाहीर झाली आहे. भाजप व कॉंग्रेस पक्षाच्या उमेदवारांनी उमेदवारी अर्ज दाखल केल्यानंतर आता माजी सैनिक सुद्धा निवडणुकीमध्ये उतरलेले आहेत. माजी सैनिकांचे प्रतिनिधित्व करण्यासाठी माजी सैनिक तुकाराम नामदेव डफळ निवडणूक लढवणार आहेत. आज निवडणूक निर्णय अधिकारी यांच्याकडे त्यांनी उमेदवारी अर्ज भरलेला आहे.
माजी सैनिकांचे प्रतिनिधी : भारत मातेच्या प्रेमापोटी आणि सैनिकांचे बलिदान आणि योगदान मोठे आहे. सैनिकांकडून विधानसभेत असे नेतृत्व जावो यासाठी आम्ही हा उमेदवारी अर्ज भरलेला आहे. आमच्यावर कुठलाही भ्रष्टाचाराचा आरोप नसल्यामुळे असे चांगले माणसे विधानसभेत पोहोचणे गरजेचे असल्याचे यावेळी माजी सैनिकांनी सांगितले.
माजी सैनिकांना संधी मिळाली पाहिजे : उमेदवारी अर्ज दाखल करताना कारगिल योद्धा व १८८९ मिसाईल रेजिमेंटचे दीपचंद नायक सहभागी झाले होते. यावेळी ते म्हणाले की, सध्या बदला युग आहे आणि जनतेला बदल हवा आहे. सैनिकांनादेखील जनतेचे प्रतिनिधित्व करण्यासाठी विधानभवनात संधी मिळाली पाहिजे. सैनिकांवर कुठलाही भ्रष्टाचाराचा आरोप नाही. याला अपवाद म्हणून काही जण असू शकतात. पण प्रामाणिक असलेल्या सैनिकांना देशाच्या कल्याणासाठी संधी मिळाली पाहिजे. यामुळे नामदेव डफळ यांचा सैनिक समाज पार्टीकडून ही उमेदवारी भरण्यात आलेला आहे, असे त्यांनी सांगितले.
सैनिकांचा आवाज पोहचवणार : उमेदवारी अर्ज दाखल केल्यानंतर माजी सैनिक नामदेव डफळ यांनी सांगितले की, सैनिकांसाठी आणि त्यांच्या कुटुंबियांसाठी आयुष्यभर काम करण्यासाठी मी विधानसभेची उमेदवारी भरली आहे. तसेच सैनिकांसाठी दिवसरात्र काम करत त्यांचा आवाज विधानभवनापर्यंत पोहचवणार आहे. जय जवान जय किसान हा नारा देत मी जनतेसाठी काम करणार आहे. देशभरातल्या सैनिकांसाठी प्रेरणा असलेल्या कारगिल युद्धातील जखमी झालेले सैनिक सुद्धा यात सहभागी झाले होते.
आम्ही प्रामाणिकपणे काम करणार : कसबा विधानसभेमध्ये विविध पक्षांकडून उमेदवार अर्ज दाखल झाले आहेत. यासोबतच सैनिक प्रतिनिधी सुद्धा आता निवडणूक रिंगणात उतरले आहेत. आजपर्यंत लष्करामध्ये सैनिक असणारे हे आता राजकारणाच्या प्रचाराच्या धुमाळीत आजपासून दिसणार आहेत. आम्ही प्रामाणिकपणे काम करणाऱ्या सैनिक आहोत ,आमच्यावर कुठलाही भ्रष्टाचार आरोप नाही, त्यामुळे असे लोक चांगले सेवा करू शकतात, असा विश्वास या सैनिकांनी यावेळी व्यक्त केला आहे. कसबा विधानसभा मतदारसंघासाठी 27 तारखेला मतदान होत असून आज पर्यंत भाजप व काँग्रेसच्या उमेदवारांनी अर्ज दाखल केले आहेत. तसेच चौदा अपक्ष उमेदवारांनी सुद्धा अर्ज भरलेले आहेत.
हेही वाचा : Jagdish Mulik on Kasba bypoll : 15ते 20 नगरसेवक भाजपाच्या संपर्कात- जगदीश मुळीक
