पुणे - मराठा आरक्षणाच्या मुद्द्यावर कोल्हापूरमध्ये होणाऱ्या आंदोलनात महाविकास आघाडीतील नेते भूमिका मांडतील, असे उपमुख्यमंत्री अजित पवार यांनी सांगितले आहे. ते पुण्यात मांजरी येथे बोलत होते. सर्वोच्च न्यायालयाने मराठा आरक्षण रद्द केले आहे. त्यासाठी आम्ही केंद्र सरकारला कायदा करण्याची मागणी केली आहे. बुधवारी (दि. 16 जून) कोल्हापूरमध्ये होणाऱ्या आंदोलनात पालकमंत्री सतेज पाटील, हसन मुश्रीफ आणि इतर नेते भूमिका मांडतील असे अजित पवार म्हणाले. जुलै महिन्यात विधिमंडळाचे अधिवेशन आहे. त्यामधे मराठा आरक्षणाबाबत चर्चा होईल, असेही यावेळी पवार म्हणाले.
पुण्यात मांजरी येथील वसंतदादा शुगर इन्स्टिट्युट येथे संचालक बैठकीसाठी अजित पवार आले होते. त्यावेळी पत्रकारांशी बोलताना अजित पवारांनी मराठा आरक्षण, आघाडी सरकार, कोरोना स्थिती अशा विविध विषयांवर भाष्य केले.
कठोर निर्णय घ्यावा लागेल
कोरोना परिस्थिती बाबत बोलताना, पुण्याचा पॉझिटिव्हीटी दर सध्या 5 टक्क्यांच्या खाली आहे. मात्र, पुन्हा जर पुण्यातील कोरोना रुग्णांची संख्या वाढली तर कठोर निर्णय घेण्याची तयारी आम्ही ठेवली आहे. त्यामुळे पुणेकरांनी काळजी घ्यावी, असे अजित पवार म्हणाले.
विरोधकांच्या पोटात दुखते
भाजपच्या आध्यत्मिक आघाडीकडून पायी वारी काढण्याबाबत सांगितले जात आहे. हे सरकार आल्याने विरोधी पक्षातील अनेकांच्या पोटात दुखणे थांबलेले नाही. महाविकास आघाडी सरकार आज पडेल, उद्या पडेल, असे म्हणत ते वेळ काढत आहेत. दुटप्पी भूमिका घेत आहेत कोरोना सारख्या परिस्थिती पायी वारी न काढण्याचा निर्णय सरकारने घेतला आहे. मात्र, विरोधक चुकीची भूमिका घेत असल्याचे अजित पवार म्हणाले.
मुख्यमंत्रीपदाची इच्छा गैर नाही
काँग्रेस प्रदेशाध्यक्ष नाना पटोले यांनी एका कार्यक्रमात मुख्यमंत्री पदाची इच्छा व्यक्त केली होती. त्यावरून आघाडीत आलबेल नसल्याच्या चर्चा सुरू झाल्या. यावर अजित पवारांनी म्हणाले, महाविकास आघाडीचे सरकार शरद पवार, सोनिया गांधी आणि उद्धव ठाकरे यांनी एकत्र येऊन बनवले आहे. हे तिघे नेते जोपर्यंत या सरकारच्या पाठीशी आहेत तोपर्यंत हे सरकार भक्कम आहे. मात्र, मुख्यमंत्री पदाची इच्छा व्यक्त करण्यात गैर नाही तसेच प्रत्येकाला आपला पक्ष वाढवण्याचा अधिकार आहे. आताचा फॉर्म्युला हा उद्धव ठाकरे यांच्या नेतृत्वाखाली काम करण्याचा आहे. नाना पटोलेंना त्यांची इच्छा व्यक्त करण्याचा अधिकार आहे. पण, मुख्यमंत्री बनण्यासाठी 145 ची मॅजीक फिगर लागते. ती ज्याच्याकडे असते तो मुख्यमंत्री होतो, असे अजित पवार म्हणाले.
उदयनराजेंना उत्तर
उदयनराजे भोसले यांनी मराठा समाजाला आरक्षण मिळत नसल्याने लोकप्रतिनिधींना गाडा, असे वक्तव्य केले होते. त्यावर बोलताना सर्वच लोकप्रतिनिधींना गाडा असे आहे ना बोलणारेही लोकप्रतिनिधीच आहेत, असे उत्तर अजित पवार यांनी दिले.
घोटाळ्याचा आरोप गंभीर
राम मंदिर ट्रस्टवर घोटाळ्याचा आरोप होणे खूप गंभीर आहे. सगळ्यांनी त्याला देणगी दिली आहे. यावर स्पष्टीकरण येणे गरजेचे आहे. हा हिंदू धर्मीयांच्या आस्थेचा प्रश्न आहे, असे अजित पवार म्हणाले.
हेही वाचा - रिक्षांची तोडफोड करणाऱ्या आरोपींची पोलिसांनी काढली धिंड
