पूर्ण बहुमत असतानाही मोदींचा कारभार नियोजन शून्यच - पृथ्वीराज चव्हाण

केंद्रातील मोदी सरकारला सात वर्ष पूर्ण झाले आहे. त्यानिमित्त देशभरात काॅंग्रेसकडून आंदोलन करण्यात आले. यासंदर्भात माजी मुख्यमंत्री पृथ्वीराज चव्हाण यांनी पुणे शहर काॅंग्रेस कमिटी कार्यालयात पत्रकार परिषद घेतली. यावेळी देशात कोरोनाचा उद्रेक तसेच मोदी सरकारची सात वर्षांची कामगिरी यावर हल्लाबोल केला.

पुणे - सात वर्षात नरेंद्र मोदी सरकारकडे पूर्ण बहूमत असतानादेखील त्यांचा कारभार हा नियोजन शून्य असल्याची टीक माजी मुख्यमंत्री पृथ्वीराज चव्हाण यांनी केली आहे. केंद्रातील मोदी सरकारला सात वर्ष पूर्ण झाले आहे. त्यानिमित्त देशभरात काॅंग्रेसकडून आंदोलन करण्यात आले. यासंदर्भात माजी मुख्यमंत्री पृथ्वीराज चव्हाण यांनी पुणे शहर काॅंग्रेस कमिटी कार्यालयात पत्रकार परिषद घेतली. यावेळी देशात कोरोनाचा उद्रेक तसेच मोदी सरकारची सात वर्षांची कामगिरी यावर पृथ्वीराज चव्हाण यांनी हल्लाबोल करत टीका केली.

देशात कोरोना उद्रेकाला मोदी जबाबदार -

अमेरिकेत झालेल्या सर्वेक्षणानुसार कोरोना परिस्थिती हाताळण्यात मोदी सरकार अकार्यक्षम ठरले आहे. राहुल गांधी यांनी कोरोनाबाबत वेळोवेळी उपाययोजना सांगूनही मोदी सरकारने योग्य ती पाऊले न उचल्याने देशात कोरोनाचा उद्रेक पाहायला मिळाला असल्याचेही चव्हाण यांनी म्हटले. टाळेबंदी करताना ही कोणत्याही प्रकारचे नियोजन न केल्याने देशात पहिल्या लाटेत 12 कोटी लोकांचा रोजगार गेला. 1 लाख टन ऑक्सिजन निर्मिती केल्याचे सांगितले असताना देखील दुसऱ्या लाटेत ऑक्सिजनची कमतरता कशी भासली याचे उत्तर मोदी सरकारने द्यावे. फक्त ताली, थाळी वाजून काहीही झाले नाही, असेही त्यांनी म्हटले.

लसीकरणात मोठ्या प्रमाणात भ्रष्टाचार -

देशात लसीकरणाचे योग्य नियोजन न केल्याने देशात लसीकरणाचा फज्जा उडाला आहे. देशात आतापर्यंत सर्वच पंतप्रधानांनी सर्वप्रथम देशवासियांना प्राधान्य दिले आहे. पण मोदी सरकारने हे न करता लसी विविध देशात पाठवल्या. लसीकरणाबाबत एकदम 200 कोटी लसीची ऑडर का केली नाही. ती जर केले असती तर आज लसीच्या किमती कमी झाल्या असत्या. लसीचे योग्य नियोजन न केल्याने लसीत मोठ्या प्रमाणात भ्रष्टाचार झाला आहे आणि याची चौकशी व्हावी, तसेच केंद्राने सर्व लसी स्वतःहा खरेदी करून याच योग्य नियोजन करायला हवे, असेही ते म्हणाले.

नोटबंदी, जीएसटीच्या निर्णयाने अर्थव्यवस्था ढासळली -

नरेंद्र मोदी सरकारने सुरवातीच्या पाच वर्षात नोटबंदी, जीएसटी सारखे निर्णय घेतल्याने भारतीय अर्थव्यवस्था मोठ्या प्रमाणात ढासळली आहे. त्याच बरोबर सीए, एनआरसी सारखे कायदे बहूमत नसताना रात्रीच्या वेळेस पास करत देशात धार्मिक वाद लावून दिला. मोदींनी आपल्या हिंदुत्त्वाचा अजेंडा जगासमोर आणून दिला. देशभरात या कायद्याच्या विरोधात आंदोलन करणाऱ्या विद्यार्थ्यांना देशद्रोही घोषित करण्याचे काम मोदी सरकारने केले, अशी टीकाही यावेळी चव्हाण यांनी केली.

देशात रोज इंधन दरवाढ -

देशात मोदी सरकारच्या कार्यकाळात कच्च्या तेलाच्या किंमती कमी झाल्या असताना देखील देशात इंधन दरवाढ वारंवार पाहायला मिळत आहे. काँगेसच्या काळात कच्च्या तेलाच्या किंमती जास्त असतानादेखील आज जेवढी इंधनदरवाढ झाली आहे. तेवढी काँग्रेस काळात नव्हती. सर्वसामान्य नागरिकांना दिलासा देण्याच्या ऐवजी मोदी सरकारने प्रत्येक गोष्टीत भाववाढ करून नागरिकांच्या खिशाला कात्री लावली आहे.

काळेकायदे आणून शेतकऱ्यांना वेठीस धरले -

देशात नरेंद्र मोदी सरकारने शेतकरीविरोधी काळेकायदे आणून देशातील शेतकऱ्यांना वेठीस धरण्याचे काम मोदी सरकारने केले आहे. आज दिल्लीच्या सीमेवर शेतकरी आंदोलन करत आहे. देशात विविध कायदे आणून देशातील सर्वच घटकांना मोदी सरकारने वेठीस धरले आहे, अशी टीका ही यावेळी पृथ्वीराज चव्हाण यांनी केली.