पुणे - ऑनलाईन खरेदी करताना गुगल पे, फोन पेच्या माध्यमातून फसवणूक होत असल्याच्या गुन्ह्यांत मोठी वाढ झाली आहे. पुण्यात 2018 साली अशा प्रकारच्या गुन्ह्यांची संख्या सुमारे 225 होती. 2019 या वर्षात ही संख्या सुमारे 800 झाली आहे.
ओएलएक्सवरून या वेबसाईट वरून खरेदी-विक्री करणाऱ्यांची संख्या वाढली आहे. या साईटवरून खरेदी-विक्री करणाऱ्यांना चोरटे सावज बनवत आहेत. पुण्यातील प्रियंका नावाच्या महिलेने घरातील जुने कपाट विकण्यासाठी ओएलएक्सवर जाहिरात टाकली होती. दुसऱ्याच दिवशी कपाट घेण्यास इच्छुक व्यक्तीचा फोन आला. मात्र, पैसे केवळ फोन पे किंवा गुगल पे नेच देणार असल्याचे सांगितले. प्रियंका यांच्या मोबाईलमध्ये संबधित अॅप नव्हते. समोरील व्यक्तrने त्यांना व्हॉट्सअॅपवर अॅप पाठवून इन्स्टॉल करण्याची संपूर्ण माहिती दिली. त्यांचा विश्वास संपादन करण्यासाठी सुरवातीला 200 रुपये पाठवले. त्यानंतर प्रियंका यांच्या खात्यातील 15 हजार रुपये लंपास केले.
हेही वाचा - पुणे कॉसमॉस बँक प्रकरण: आतापर्यंत १८ जणांना अटक
पुण्याच्या सायबर पोलीस ठाण्यात रोज अशाप्रकारच्या 10 ते 15 तक्रारी दाखल होत आहेत. ऑनलाईन खरेदी करताना नागरिकांनी योग्य ती खबरदारी घेणे गरजेचे आहे. समोरील व्यक्ती आपल्याला फसवत तर नाही ना याची आधी खात्री करावी. आपण वापरत असलेल्या अॅप विषयी माहिती असेल तरच त्याचा वापर करावा. अन्यथा तुमची फसवणूक होऊ शकते, असे आवाहन सायबर पोलीस ठाण्याचे पोलीस निरीक्षक जयराम पायगुडे यांनी केले आहे.
फसवणुकीचे गुन्हे करणारे आरोपी राजस्थान येथील अल्वर आणि भरतपूर जिल्ह्यातून फोन करतात. यासाठी ते दुसऱ्या व्यक्तीच्या नावाचे सिमकार्ड वापरतात. गुन्हेगारांविषयी पोलिसांना माहिती मिळली असून लवकरच त्यांना अटक केली जाईल, अशी माहितीही पायगुडे यांनी दिली.
