पुणे - क्रीडा क्षेत्रात युवतींनी क्रिकेटकडे करिअर करण्याच्या दृष्टीने बघायला हवे. ग्रामीण भागातील मुलींमध्ये चांगले क्रिकेट खेळण्याची क्षमता आहे. या मुलींनी क्रिकेट खेळण्याचा विचार करायला हवा, असे मत भारतीय महिला क्रिकेटपटू अनुजा पाटीलने बारामतीत व्यक्त केले. बारामती येथील डॉ. बाबासाहेब आंबेडकर स्टेडियमवर धीरज क्रिकेट अकादमीच्या वतीने टी-२० महिला प्रीमियर लीग सामन्यांचे आयोजन करण्यात आले होते. यात अनुजाने बारामती संघातून आपला दर्जेदार खेळ दाखवला.
अनुजाने ऑस्ट्रेलिया, वेस्टइंडीज, श्रीलंका, चीन, थायलंड, दुबई, मलेशिया, या ठिकाणी भारताचे प्रतिनिधित्व केले आहे. अनुजा म्हणाली, की क्रिकेटमध्ये केवळ मैदानात खेळण्याइतपतच मर्यादित काम नसते. पंचगिरी, फिजिओथेरपिस्ट, निवेदक, स्कोरर, मॅच रेफरी यासह इतर अनेक ठिकाणी काम करण्याच्या संधी उपलब्ध आहेत. ग्रामीण भागातील युवतींकडे उत्तम प्रकारे क्रीडा कौशल्य आहे. त्यामुळे ग्रामीण भागातील युवतींनी क्रिकेटकडे करिअरच्या दृष्टीने पाहावेृ. ध्येय निश्चिती झाली आणि मेहनत करण्याची तयारी असेल तर क्रिकेटमध्ये करिअर करण्यास काहीच अवघड नाही.
हेही वाचा - स्टार्कसोबत इंग्लंडचा 'हा' दिग्गज फलंदाज असणार आयपीएलबाहेर!
