पुणे - आयटी हब म्हणून ओळखल्या जाणाऱ्या हिंजवडीत फेज दोन येथे दोन अज्ञात व्यक्तींनी व्यावसायिकाला मारहाण करत लुटल्याचे घटना घडली आहे. चोरट्याने १ लाख ४१ हजार रुपयांची चार तोळे सोन्याची साखळी हिसकावून पळ काढला. याप्रकरणी मनोज कुमार (वय ४७) यांनी हिंजवडी पोलिसात तक्रार दाखल केली आहे.
फिर्यादी मनोज हे सहकारी नमिता जैन हिला रात्रीच्या सुमारास हिंजवडीमधील फेज तीन येथे सोडवण्यासाठी चारचाकीने जात होते. तेव्हा, इन्फोसिस फेज दोन येथे समोरून येणाऱ्या रिक्षाने त्यांच्या चारचाकीला जोरात धडक दिली. रिक्षातून दोन इसम खाली उतरले आणि मनोज यांना बेदम मारहाण करत त्यांच्या गळ्यातील चार तोळ्यांची सोन्याची साखळी हिसकावून रिक्षासह पळ काढला.
हिंजवडी पोलीस घटनेचा अधिक तपास करत आहेत. गेल्या काही दिवसांपासून पिंपरी-चिंचवड शहरात चोरीचे प्रमाण वाढले आहे. काही दिवसांपूर्वी पिंपरी येथे शीतळा देवी मंदिरातून दान पेटी आणि चांदीचा मुकुट चोरांनी लंपास केल्याची प्रकारही समोर आला होता.