पुणे - आज श्रावण मासातील दुसरा सोमवार आहे. सह्याद्रीच्या कुशीतील वसलेल्या बारा ज्योतिर्लिंगापैकी एक असलेल्या भीमाशंकरला रविवारपासूनच भाविकांनी गर्दी करायला सुरुवात केली होती. आज सकाळी पहाटेची आरती झाल्यानंतर दर्शनासाठी मंदिर खुले करण्यात आले आहे. पांढऱ्याशुभ्र धुक्यात वेढलेला हा परिसर भक्तिरसात न्हाऊन गेला आहे. यावेळी दीड ते दोन लाख भाविकांनी ज्योतिर्लिंगाचे दर्शन घेतले आहे.
भीमाशंकर येथे येण्यासाठी पुणे-नाशिक महामार्गावरील राजगुरुनगर व मंचर अशा दोन मार्गाने भाविक येत असतात. आज दुसऱ्या सोमवारी भाविकांची गर्दी असल्याने वाहतूक कोंडी होऊ नये यासाठी मंदिराच्या मागेच निघडाळे, तेरंगण फाटा व वनविभागाच्या हद्दीत पार्किंग करण्यात आली होती. त्यामुळे भाविकांना पाच ते सात किलोमीटरचा पायी प्रवास करावा लागत आहे, यावेळी पोलिसांकडून चोख बंदोबस्त ठेवण्यात आला आहे.
बारा ज्योतिर्लिंगांपैकी एक असणाऱ्या भीमाशंकराचे मंदिर हे हेमाडपंथी असून मंदिराच्या पाठीमागील बाजूस मोक्षकुंड आहे. याठिकाणी कैड्यंण्य ॠषींनी पिंडदान केले होते. त्यामुळे त्याठिकाणी जो स्नान करेल त्याला मोक्षाची प्राप्ती होईल, असे आख्यायिका आहे.
श्रावण महिन्याच्या दुसऱ्या सोमवारानिमित्ताने हर हर महादेव, ॐ नम:शिवाय, म्हणत भाविकांनी या परिसरात पहाटेपासूनच रांगा लावत दर्शनाला सुरुवात केली. देवस्थानच्यावतीने गाभारा व मंदिर परिसरात व पार्किंग परिसरात सुरक्षारक्षकांमार्फत तसेच पोलिसांकडून बंदोबस्त ठेवण्यात आला आहे.
