पुणे - कोरोनाचा प्रादुर्भाव रोखण्याच्या पार्श्वभूमीवर जिल्ह्यातील पर्यटनस्थळावर जाण्यास पर्यटकांना मज्जाव करण्यात आला आहे. परंतु, अनेक पर्यटक हे नियमांची पायमल्ली करून बिनधास्त वर्षाविहार करताना पाहायला मिळत आहेत. रविवार सुट्टीचा दिवस असल्याने काही पर्यटकांनी पवना धरण परिसरात गर्दी केली होती. कोरोनाचा धोका विचारात घेता आता पर्यटकांना बजरंग दलाच्या कार्यकर्त्यांकडून मावळ परिसरात न येण्याचे आवाहन वजा इशारा देण्यात आला आहे.
रविवारी पवना धरण परिसरासह तुंग, तिकोणा, विसापूर, लोहगड किल्ल्यावरही पर्यटकांची मोठ्या प्रमाणात गर्दी पाहायला मिळाली. पुणे, मुंबई, पिंपरी-चिंचवड या शहरात कोरोनाचा प्रादुर्भाव जास्त असून तेथील पर्यटक मावळ परिसरात येत आहेत. त्यामुळे स्थानिक नागरिकांची डोकेदुखी वाढली आहे. तसेच त्यांच्यामध्ये कोरोनाच्या प्रादुर्भाव होण्याच्या शक्यतेमुळे भीतीचे वातावरण निर्माण झाले आहे. या परिस्थितीच्या पार्श्वभूमीवर आता बजरंग दलाच्या कार्यकर्त्यांनी पर्यटकांना मावळ परिसरात न येण्याचे इशारावजा आवाहन केले आहे.
