पुणे : मन:शांतीच्या स्थैर्याचा वस्तुपाठ, व्यक्तिमत्व विकासाचा आलेख, स्वयंपूर्णतेचे दिव्य दान, सुख, शांती, समाधान, प्रसन्नता यांसह आत्मानंदाची महायात्रा असलेल्या श्री गणेश अथर्वशिर्ष ( Shri Ganesha Atharvashirsh ) यावरील सर्टीफिकेट कोर्सला प्रारंभ झाला आहे. सावित्राबाई फुले पुणे विद्यापीठाच्या ( Savitrabai Phule Pune University ) मान्यतेने श्रीमंत दगडूशेठ हलवाई ( Dagdusheth Halwai ) सार्वजनिक गणपती ट्रस्टच्या पुढाकाराने हा कोर्स होत आहे.
प्राध्यापक हरी नरके यांचा विरोध - कोणत्याही वयोगटातील व्यक्तीला हा कोर्स करता येणार असून विशेषत: विद्यार्थ्यांना या कोर्स पूर्ण केल्यानंतर एक श्रेयांक मिळणार आहे. अर्थवशिर्षावरील कोर्सच्या माध्यमातून भारतीय संस्कृती जागतिक पातळीवर नेण्याचे केले जात आहे. पण आत्ता याला प्राध्यापक हरी नरके यांनी विरोध केला असून पुन्हा एकदा पेशवाईची स्वप्नं ही सनातनी मंडळी रंगवत असून त्यासाठी विद्यापीठे वेठिला धरली जात आहेत. हे धोकादायक पाऊल आहे असे त्यांनी म्हटल आहे.
श्री गणेश अथर्वशिर्ष सर्टीफिकेट कोर्सचा प्रारंभ - श्रीमंत दगडूशेठ हलवाई सार्वजनिक गणपती ट्रस्ट, सावित्रीबाई फुले पुणे विद्यापीठ, संस्कृत प्राकृत विभाग, लोकमान्य टिळक महाविद्यालय वणी, संस्कृत विभाग यांच्या संयुक्त विद्यमाने व्यक्तिमत्व विकासाचा आलेख - मन:शांतीचा राजमार्ग श्री गणेश अथर्वशिर्ष याविषयावरील सर्टीफिकेट कोर्सचा प्रारंभ दगडूशेठ गणपती मंदिरात काही दिवसांपूर्वी झाला. भारत सरकारने नवीन राष्ट्रीय शैक्षणिक धोरण अवलंबिले आहे. या कोर्सच्या माध्यमातून भारताची परंपरा सर्वांपर्यंत पोहोचणार आहे. हा कोर्स एकच विद्यापीठापुरता मर्यादित न ठेवता सर्वच विद्यापीठात असायला हवा.
मानसिक विकास झाला, तर जगाची देशाची सेवा - मंत्राचे महत्व, शारिरीक, मानसिक फायदे लोकांपर्यंत पोहोचले, तर सर्वजण याचा मनस्वी आनंद घेतील. शिक्षणाला अध्यात्म, ज्ञान, विज्ञानाची जोड देत योग्य सांगड घालणे महत्वाचे आहे. कोणतीही पूजा मनाने केली तरच त्यात आपण समर्पित होतो. मानसिक विकास झाला, तर जगाची देशाची सेवा घडेल.अस यावेळी विद्यापीठाचे कुलगुरू डॉ. कारभारी काळे म्हणाले. श्री गणपती अथर्वशिर्ष अनेकांना मुखोद्गत आहे. मात्र, त्याचा अर्थ माहित नाही. त्याच्या शास्त्रीयदृष्टया अर्थाचे विवेचन ट्रस्टच्या यू टयूब चॅनलवर करण्यात आले आहे.
ई मेलवर सर्टीफिकेट मिळणार - अथर्वशिर्षाचे २१ भाग असून त्याचे विवेचन गाणपत्य विद्यावाचस्पती स्वानंद पुंड शास्त्री यांनी केले आहे. कोर्समध्ये त्याच्यासोबत एक प्रश्नमालिका येणार आहे. त्याची उत्तरे दिल्यानंतर पुढील भाग पाहता येणार असून ती पूर्ण केल्यानंतर ई मेलवर सर्टीफिकेट मिळणार आहे. सहभागी विद्यार्थ्यांना एक श्रेयांक देखील मिळणार आहे. भारतीय तत्वज्ञानाचा प्रचार-प्रसार करण्याकरिता ट्रस्टने पुढचे पाऊल उचलले अस यावेळी श्रीमंत दगडूशेठ हलवाई गणपती ट्रस्टचे अध्यक्ष माणिक चव्हाण म्हणाले.
उलट्या पावलांचा प्रवास - सावित्रीबाई फुले पुणे विद्यापीठाने अथर्वशीर्ष अभ्यासक्रम सुरू करणे हा उलट्या पावलांचा प्रवास आहे. पुन्हा एकदा पेशवाईची स्वप्नं ही सनातनी मंडळी रंगवत असून त्यासाठी विद्यापीठे वेठिला धरली जात आहेत. हे धोकादायक पाऊल आहे. उद्या पुढचे पाऊल म्हणून आधुनिक विज्ञानाचे अभ्यासक्रम बंद केले जातील. हे सारे भयंकर आहे असे यावेळी प्रा. हरी नरके म्हणाले.
