पुणे - पाच वर्षे सत्तेत होता तेव्हा शिवसेना झोपली होती का? अशी टीका राष्ट्रवादीचे नेते अजित पवार यांनी केली आहे. पुण्यात राष्ट्रवादी कार्यकर्त्यांच्या बैठकीवेळी ते पत्रकारांशी बोलत होते.
दसरा मेळाव्यात उद्धव ठाकरेंनी शेतकरी आणि सर्वसामान्यांवर आश्वासनांची खैरात केली होती. अजित पवारांनी याचाच समाचार घेतला आहे. निवडणुका आल्यावर यांना शेतकऱ्यांच्या आणि सामान्यांच्या प्रश्नांची आठवण होते. मग पाच वर्ष यांनी झोपा काढल्या का? असा सवाल अजित पवार यांनी विचारला आहे. सत्तेत असताना कर्जमाफी करायची होती. त्यावेळी दहा रुपयांमध्ये थाळी द्यायची होती. हे सरकार शेतकरी विरोधी आहे. असेही पवार यावेळी म्हणाले.
हेही वाचा - पाच वर्षे सत्तेत असताना उद्धव ठाकरेंनी काय केले- शरद पवार
दसरा मेळाव्याच्या भाषणात उद्धव ठाकरेंनी अजित पवारांवर टीका केली होती. त्यावर प्रत्युत्तर देताना पवार म्हाणाले, माझे अश्रु तपासण्यापेक्षा तुमची युती कशी टिकेल हे पाहा. महाराष्ट्रातल्या तमाम जनतेला माझा स्वभाव माहिती आहे. मी रडणारा किंवा पळून जाणारा माणूस नाहीये. त्यावेळेसची परिस्थिती वेगळी होती. ते माझ्याकडून घडायला नको होतं. परंतू मला माझ्या मनावर नियंत्रण ठेवता आले नाही, म्हणून ते घडलं. पण त्याचा आणि याचा अर्थार्थी संबंध नाही. तो एक भावनिक मुद्दा होता, असेही अजित पवार यावेळी म्हणाले.
हेही वाचा - अजित पवारांचे भर सभेतील फोनवरील संभाषण चर्चेत
काँग्रेस आणि राष्ट्रवादी विलीनीकरणावर काय म्हणाले पवार -
काँग्रेस आणि राष्ट्रवादी काँग्रेसचे विलीनीकरण करावे असे सुशीलकुमार शिंदे म्हणाले आहेत. यावर बोलताना अजित पवार म्हणाले की, शिदे साहेब काँग्रेसचे ज्येष्ठ नेते आहेत. त्यांचे हे वैयक्तीक मत आहे. या निवडणुकांमध्ये आघाडीचे सरकार कसे येईल आणि 175 पेक्षा जास्त जागा कशा निवडून येतील हे एकमेव ध्येय आमच्या समोर आहे. त्यामुळे या वक्तव्यावर वेगळं उत्तर देऊन काँग्रेस राष्ट्रवादीच्या कार्यक्रत्यांमध्ये संभ्रमावस्था निर्माण करायची नाही.
हेही वाचा - रोहित पवार विजयी होणारच! आईसह पत्नीने व्यक्त केला विश्वास
