तमाशा फडमालक अन् कलावंतांची उपोषण, सांस्कृतिकमंत्र्यांच्या आश्वासनानंतर माघार

तमाशा पंढरी म्हणून ओळखल्या जाणाऱ्या नारायणगाव येथे तमाशा फड मालक, कलावंत व इतर कामगारांनी विविध मागण्यांसाठी उपोषण सुरू केले होते. मात्र, सांस्कृतिकमंत्री अमित देशमुख यांच्या आश्वासनानंतर त्यांनी दोन तासांत उपोषण मागे घेतले.

पुणे - तमाशा पंढरी, अशी ओळख असलेल्या नारायणगावात महाराष्ट्र राज्य तमाशा फड मालक व कलावंतांनी विविध मागण्यांसाठी लाक्षणिक उपोषण केले होते. उपोषण सुरू केल्यानंतर दोन तासांत सांस्कृतिकमंत्री अमित देशमुख यांच्या आश्वासनानंतर स्थानिक आमदार अतुल बेनके यांच्या उपस्थितीत उपोषण स्थगित केल्याचे रघुवीर खेडकर यांनी सांगितले.

कोरोनाच्या पार्श्वभूमीवर झालेल्या टाळेबंदीनंतर तमाशा कलावंत, कामगार व तमाशाशी निगडित असणारी प्रत्येक व्यक्ती ही आर्थिक संकटात सापडली होती. या कलावंत, कलाकारांची व कामगारांचे कुटुंब आर्थिक संकटांना तोंड देत असताना महाराष्ट्र राज्य तमाशा फडमालक कलावंत विकास महामंडळाच्या वतीने रघुवीर खेडकर यांच्या नेतृत्वाखाली लाक्षणिक उपोषण तमाशा पंढरी म्हणून ओळख असलेल्या नारायणगावात सुरू करण्यात आले होते. यावेळी रघुवीर खेडकर, मालती इनामदार यांसह छोटे-मोठे फडमालक, कलावंत व कामगार उपस्थित होते.कलावंतांच्या प्रमुख मागण्या

• शासनाने कला व लोककला यांची अधिकृत घोषणा करावी
• तमाशासाठी एक वेगळे महामंडळ स्थापन करावे
• कलावंतांना टाळेबंदीच्या काळात दरमहा प्रत्येकी पाच हजारांची मदत मिळावी
• प्रत्येक फड मालकास तात्काळ आर्थिक पॅकेज जाहीर करावे
• फडमालकांच्या फड उभारणीसाठी 25 लाख रुपयांची रक्कम बँकेतून कर्जरूपी मिळावी
• टाळेबंदीनंतर लोककलेच्या कार्यक्रमास परवानगी द्यावी
• तमाशात काम करणाऱ्या प्रत्येक कलाकार कामगारांना घरकुल व मुलांच्या शिक्षणासाठी आर्थिक तरतूद करावी

हेही वाचा - पुणे- सोलापूर महामार्ग : एका रात्रीत ३ भीषण अपघात; ८ जणांचा मृत्यू