पुणे - स्वराज्यरक्षक संभाजी मालिका हे एक व्रत आणि स्वप्न होते. ती मालिका आता पुर्णत्वास जात असताना अभिनय क्षेत्रातून निवृत्ती घेऊन शिरुर लोकसभा मतदार संघातील प्रश्न सोडविण्यासाठी पूर्ण वेळ देण्याचे आश्वासन खासदार डॉ. अमोल कोल्हेंनी दिले. शुक्रवारी मालिकेचा शेवट लवकरच होत असताना पुढील काळात संपूर्ण वेळ मतदार संघात देणार असल्याचे कोल्हेंनी स्पष्ट केले. ते छत्रपती संभाजी महाराज बलिदानस्थळी पत्रकार परिषदेत बोलत होते.
लोकसभा निवडणुकीनंतर खासदार कोल्हे मतदार संघात येत नसल्याच्या तक्रारी दिवसेंदिवस येत होत्या. चार महिन्यांपूर्वी खासदारांचा जनता दरबार भरणार असल्याची घोषणा करण्यात आली होती. मात्र, खासदार कोल्हे वेळ देऊ शकले नसल्याने नागरिकांमध्ये नाराजीचा सुर उमटताना दिसत होता. यावर बोलताना खासदार कोल्हे म्हणाले, की मागील एक वर्षात नेता की अभिनेता असाच प्रवास झाला. यापुढे जनतेच्या कामांना वेळ देणार असल्याचे त्यांनी पत्रकार परिषदेत जाहीर केले.
हेही वाचा -
एल्गार परिषदेचा तपास अखेर 'एनआयए'कडे, पुणे न्यायालयाचा आदेश
कार्यसम्राट आमदारांच्या माध्यमातून संपर्क साधा - कोल्हे
पुढील काळात प्रत्येक मतदारसंघात महिन्यातील एक दिवस देण्याचा प्रयत्न असून शिरुर लोकसभा मतदार संघातील विधानसभानुसार जनतेने कार्यसम्राट आमदारांना निवडून दिले आहे. त्यांच्या माध्यमातून जनतेने माझ्याशी संपर्क साधून माझ्या वाट्याला येणारी कामे मी पार पाडेल, असे आश्वासन यावेळी खासदार कोल्हेंनी दिले. त्यामुळे पुढील काळात जनतेला थेट खासदारांशी संपर्क न साधता कार्यसम्राट आमदारांशी संपर्क साधावा लागणार आहे.
