पुणे - स्वराज्य रक्षक संभाजी मालिकेतील अभिनेता डॉ. अमोल कोल्हे यांनी विजयाचा झेंडा रोवत शिरूर लोकसभा मतदार संघावर आपला हक्क गाजवला. परंतु, हा विजय राष्ट्रवादी काँग्रेसचा नसून सामान्य जनतेने संभाजी महाराजांना केंद्रस्थानी ठेवून मतदान केल्याने हा विजय छत्रपती संभाजी महाराजांचा असल्याचे शिवसेनेचे माजी खासदार शिवाजीराव आढळराव पाटील यांनी मत व्यक्त केले.
माजी खासदार शिवाजी आढळराव पाटील यांनी पराभवानंतर पंधरा वर्षात नियमित भरणारा जनता दरबार आजही नेहमीप्रमाणे भरणार असल्याचे यावेळी बोलताना सांगितले. यावेळी अनेकांनी जनता दरबारात येऊन आपल्या समस्या मांडल्या. शिरूर लोकसभा मतदारसंघातील पराभव मान्य करून पराभवातील चुका सुधारण्याचा प्रयत्न केला जाईल, असे आश्वासन नागरिकांना दिले. गेल्या पंधरा वर्षांपासून शिरूर लोकसभा मतदार संघावर शिवसेनेचे खासदार शिवाजीराव आढळराव पाटील यांचे वर्चस्व होते. मात्र, या मतदारसंघावर राष्ट्रवादी काँग्रेसला वर्चस्व मिळविण्यासाठी विविध प्रयोग करावे लागले.
शिरूर लोकसभा मतदारसंघात माझ्या पराभवामुळे मला वाईट वाटले नाही तर चौथ्यांदा निवडून आलो असतो तर शिवसेनेला महत्त्वाचे मंत्रीपद मिळाले असते. हे मंत्रीपद गेल्याने तालुक्यातील जनतेला दुःख झाले आहे, असे स्पष्टीकरण यावेळी आढळराव पाटलांनी दिले. माझ्या पराभवाचा वचपा आंबेगाव तालुक्यातील जनता नक्कीच भरून काढेल असे सांगत थेट राजकीय विरोधक असलेल्या दिलीप वळसे पाटील यांच्यावर त्यांनी निशाणा साधला. यापुढेही जनता दरबार भरला जाईल, अशी स्पष्टोक्ती आढळराव पाटील यांनी पत्रकार परिषदेत दिली.
विधानसभा निवडणुकीत मी उभा राहणार नाही, तर जनता ठरवेल तो उमेदवार इथून दिला जाईल. पण आपल्या दादाला ज्याने पाडले त्याचा आंबेगावची जनता समाचार घेतल्याशिवाय राहणार नाही, असे सांगत दिलीप वळसे पाटील यांच्यावर आढळराव पाटलांनी निशाणा साधला. शिरूर लोकसभा मतदारसंघातील सहाही विधानसभा मतदारसंघात विजयाचा झेंडा रोवणार असल्याचे माजी खासदार शिवाजी आढळराव पाटील यांनी यावेळी सांगितले
दरम्यान राज्यसभा हा माझा विषय नाही. मी लढणारा कार्यकर्ता आहे. त्यामुळे संधी मिळाली तरी राज्यसभेवर जाणार नाही, असे सांगत राज्यसभेवर जाण्याच्या चर्चेला पूर्णविराम दिला.
