पुणे - पुणे शहरातल्या सिंहगड रस्ता परिसरातील नागरिक वाहतूक कोंडीच्या समस्येने गेली अनेक वर्षे त्रस्त आहेत. या भागातील वाहतूक कोंडी सोडवण्याच्या दृष्टीने आता विठ्ठलवाडी ते माणिकबाग दरम्यान उड्डाणपूल केला जाणार आहे, अशी माहिती आमदार माधुरी मिसाळ यांनी दिली आहे. सिंहगड रस्त्यावर विठ्ठलवाडी कमान ते माणिकबाग दरम्यान उड्डाणपूल होणार असून, त्यासाठी महानगरपालिके तर्फे जिओ टेक्निकल सर्वेक्षण करून अहवाल दाखल करण्यात आला आहे. लवकरच प्रत्यक्ष कामास सुरूवात होईल, असे आमदार मिसाळ यांनी सांगितले. महानगरपालिकेच्या अंदाजपत्रकात या कामासाठी १२५ कोटी रुपयांची तरतूद उपलब्ध झाली आहे. उड्डाणपुलाचे काम २०२२ पर्यंत पूर्ण होण्याची शक्यता आहे.
सिंहगड रस्त्यावरील वाहतूक कोंडी मोठ्या प्रमाणावर कमी करण्यासाठी या उड्डाणपुलाचा उपयोग होईल. दरम्यान पुणे शहरात सध्या मेट्रो मार्गाची उभारणी केली जात आहे. मेट्रोच्या पुढील टप्प्यात सिंहगड रस्त्यावर मेट्रो असावी, अशी मागणी नागरिकांकडून केली जात आहे. त्यामुळे या उड्डाणपुलाचा अडसर मेट्रोला होईल का? अशी शंका उपस्थित केली जात आहे. अगोदरच प्रचंड वाहतूक असलेल्या सिंहगड रस्त्यावर उड्डाणपूल आणि मेट्रो मंजूर झाल्यास मेट्रोची कामे यामुळे नागरिकांना आणखी 4 ते 5 वर्ष वाहतूक कोंडीतून सुटका नाही अशी परिस्थिती दिसते आहे.
