परभणी - पाण्यासाठी आक्रमक झालेल्या महिलांनी आज (मंगळवारी) चक्क ग्रामसेवकाला डांबण्याचा प्रयत्न केला. मात्र, गटविकास अधिकारी, तहसीलदार यांच्या मध्यस्थीमुळे ३ तासानंतर या ग्रामसेवकाची सुटका झाली. हा प्रकार गंगाखेड तालुक्यातील खंडाळी येथे घडला.
खंडाळी गावात पाणीटंचाई असल्याने पाण्याचा टँकर सुरू करण्याबाबत जानेवारीमध्ये ग्रामपंचायतीत ठराव घेण्यात आला. त्यांनतर पंचायत समितीकडे हा प्रस्ताव सादर करूनसुद्धा टँकर सुरू झाले नाही. किरकोळ त्रुटी दाखवून प्रस्ताव परत पाठविण्यात येत असल्याने महिला आणि ग्रामस्थ संतप्त झाले. यामुळे सकाळी गावात आलेले ग्रामसेवक एम. व्ही. नवटके यांना घेराव घालत जाब विचारला. टँकर सुरु करण्याच्या मागणीसाठी महिलांसह आक्रमक झालेल्या ग्रामस्थांनी या ग्रामसेवकाला समाज मंदिरात बसवून ठेवले. याबाबत ठोस आश्वासन मिळेपर्यंत बाहेर जावू देणार नाही, असा पवित्रा घेतला.
ही माहिती समजताच पंचायत समितीचे गटविकास अधिकारी प्रविण सुराडकर, तहसीलदार स्वरूप कंकाळ यांनी भ्रमणध्वनीवरून ग्रामस्थांशी संवाद साधला. पाणीटंचाई लक्षात घेता गावाला भेट देऊन टँकर सुरू करण्याचा निर्णय लवकरच घेण्यात येईल, अशी माहिती दिली. त्यामुळे ३ तासानंतर ग्रामसेवकाची सुटका करण्यात आली.
या आंदोलनात तंटामुक्ती समिती अध्यक्ष दत्तराव पवार, राजाराम पवार, सरपंच मोतीराम कोल्हे, कोंडीबा जंगले, माजी सरपंच सदाशिव भोसले, नितीन पवार, गंगाराम भोसले, बाबुराव भोसले, रामकीशन जंगले, सखाराम जंगले, अंजनाबाई माळवे, रंभाबाई हासले, वैशाली जंगले, छायाबाई जंगले, सुशिला जंगले, संगीता पवार, सागरबाई कोल्हे, मुक्ताबाई कोल्हे, जनाबाई भोसले, राधाबाई भोसले, भगवान भोसले, नारायण भोसले, बाळू सूर्यवंशी, राम कोल्हे, श्रीरंग भोसले, माधव सूर्यवंशी आदी सहभागी झाले होते.
