परभणी - आजपर्यंतचे सर्वाधिक म्हणजे 14 रुग्ण रविवारी रात्री उशीरा आलेल्या अहवालात आढळून आल्याने खळबळ उडाली आहे. यामध्ये गंगाखेड तालुक्यातील 11 तर परभणीतील 2 आणि सेलूच्या एका रुग्णाचा समावेश आहे. त्यानुसार परभणीत कोरोनाबाधितांची संख्या 36 वर गेली आहे. त्यापैकी एका रुग्णाचा मृत्यू झाला असून, एक ठणठणीत बरा होऊन घरी परतला आहे. त्यामुळे आता 34 रुग्णांवर उपचार करण्यात येत आहेत.
रविवारी दिवसभर नांदेडच्या प्रयोगशाळेतून परभणीत एकही पॉझिटिव्ह अथवा निगेटिव्ह असा कुठलाच अहवाल प्राप्त झाला नव्हता. ज्यामुळे समाधान व्यक्त होत होते. गेल्या आठ दिवसांपासून दररोज कोरोनाबाधितांची खबर मिळत होती. रविवारी एक दिवस आनंदात जाईल असे वाटत असतानाच झाले उलटेच. आजपर्यंतच्या सर्वाधिक कोरोनाबधितांची खबर रविवारी परभणीत येऊन धडकली. ज्यामुळे एकच खळबळ उडाली. या बाधितांमध्ये गंगाखेड तालुक्यातील माखणी येथील तब्बल 11 रुग्ण असून, परभणी शहरातील पोलीस वसाहतीतील इमारत क्रमांक 19 मधील एक तर परभणी तालुक्यातील माळसोन्ना येथील एक आणि सेलू तालुक्यातील ब्रह्मवाकडी येथील एका रुग्णाचा समावेश आहे.
दरम्यान, यापूर्वी परभणी जिल्ह्यात 22 रुग्ण पॉझिटिव्ह आढळून आलेले आहेत. त्यापैकी जिंतूर तालुक्यातील एका महिला रुग्णाचा मृत्यू झाला आहे, तर एक रुग्ण बरा होऊन घरी परतला आहे. त्यानंतर 20 रुग्ण कोरोना हॉस्पिटलमध्ये उपचार घेत असताना त्यामध्ये आता या 14 रुग्णांची भर पडली आहे. त्यानुसार आता उपचार घेणाऱ्या रुग्णांची संख्या 34 एवढी झाली आहे.
दरम्यान, आजपर्यंत 1921 पैकी 1617 जणांचे अहवाल निगेटिव्ह आले आहेत. त्यात आतापर्यंत एकूण 22 जणांचे अहवाल पॉझिटिव्ह असून 22 संशयितांचे अहवाल अनिर्णायक आहेत. तर 22 जणांचे स्वॅब तपासणीसाठी आवश्यक नसल्याचाही अहवाल मिळाला आहे. शिवाय एकूण 238 स्वॅबचे अहवाल प्रलंबीत आले आहेत. रविवारी जिल्हा शासकीय रुग्णालयातून 55 जणांचे स्वॅब नांदेड येथील स्वामी रामानंद तीर्थ मराठवाडा विद्यापीठातील प्रयोगशाळेकडे पाठविण्यात आले आहेत.
दरम्यान, जिल्हा शासकीय रूग्णालयाच्या विलगीकरण कक्षात रविवारीपर्यंत 462 तर रुग्णालयातील संसर्गजन्य कक्षात 266 जण आहेत. या शिवाय विलगीकरणाचा कालावधी पूर्ण करून घरी परतलेल्या व्यक्तींची संख्या 1162 एवढी आहे.
पोलीस वसाहतीतील इमारत, माळसोन्ना, माखणी आणि ब्रह्मवाकडी प्रतिबंधित क्षेत्र म्हणून जाहीर
दरम्यान, जिल्हाधिकाऱ्यांनी रात्री 11.35 वाजता परभणी शहरातील पोलीस वसाहतीत असणाऱ्या इमारत क्रमांक 19 सह तालुक्यातील माळसोन्ना, गंगाखेड तालुक्यातील माखणी आणि सेलू तालुक्यातील ब्रह्मवाकडी आदी गावे प्रतिबंधित क्षेत्र म्हणून जाहीर केले आहेत. याठिकाणी निर्जंतुकीकरणाचे काम तसेच हा सर्व परिसर सील करण्याचे आदेश जिल्हाधिकारी दीपक मुगळीकर यांनी बजावले आहेत. त्यानुसार तात्काळ 12 वाजता ही प्रक्रिया सुरू झाली होती.
