परभणी - जिल्ह्यात गेल्या काही दिवसांपासून बर्ड फ्ल्यूने थैमान घातले आहे. त्यामुळे या ठिकाणच्या कोंबड्यांचे नमुने तपासणीसाठी पुणे येथील प्रयोगशाळेत आणि तेथून पुढे भोपाळ येथे हायसिक्युरिटी ॲनिमल डिसीज लॅबला पाठवावे लागतात. मात्र, या ठिकाणाहून येणाऱ्या अहवालाची दीर्घकाळ प्रतीक्षा करावी लागते. त्यामुळे महाराष्ट्रातील अशा प्रकारच्या तपासण्या होण्यासाठी परभणीत हायसिक्युरिटी ॲनिमल डिसीज लॅबची उभारणी करावी, अशी मागणी परभणीचे आमदार डॉ. राहुल पाटील यांनी आज (मंगळवारी) मुख्यमंत्री उद्धव ठाकरे यांच्याकडे केली आहे.
जिल्ह्यात पसरणाऱ्या बर्डफ्लू या संसर्गाच्या प्रभावी उपाययोजनेसाठी प्रादेशिक पशुसंवर्धन अधिकाऱ्यांसोबत आमदार डॉ.राहुल पाटील यांची बैठक पार पडली. या बैठकीत झालेल्या चर्चेनंतर आमदार पाटील यांनी परभणी येथे तात्काळ हायसिक्युरिटी अ‍ॅनिमल डिसीज लॅबच्या उभारणीस मंजुरी देण्यात यावी, अशी मागणी मुख्यमंत्री उध्दव ठाकरे यांच्याकडे केली.
'संबंधित अधिकाऱ्यांची बैठक -
परभणी जिल्ह्यात गेल्या काही दिवसांपासून बर्ड फ्लूच्या प्रादुर्भावाने डोके वर काढले आहे. त्यामुळे हजारो कोंबड्या व इतर पक्षी मृत्यूमुखी पडल्याचे निदर्शनास आले आहे. या पार्श्वभुमीवर संबंधित रोगाच्या प्रादुर्भावाचा प्रतिबंध करण्यासाठी परभणी येथे हायसिक्युरिटी अ‍ॅनिमल डिसीजलॅब उभारणीची गरज आहे. या बाबत आज (मंगळवार) प्रादेशिक पशुसंवर्धन अधिकाऱ्यांशी तातडीची बैठक आमदार संपर्क कार्यालयात बोलावण्यात आली होती. या बैठकीस औरंगाबाद येथील प्रादेशिक पशुसंवर्धन सहआयुक्त डॉ.संजय गायकवाड, जिल्हा पशुसंवर्धन अधिकारी डॉ.अशोक लोणे, जिल्हा पशुसंवर्धन सहआयुक्त शिवाजी पवार, पशुधन विकास अधिकारी डॉ.प्रकाश सावने, सहपशुधन अधिकारी आर.बी. शितळे, मनपा सदस्य सुशील कांबळे आदि उपस्थित होते.
देशात भोपाळ येथेच आहे लॅब -
देशात सद्यस्थितीत भोपाळ येथे बीएसएल-4 ही बायो सेक्युरिटी लॅब अस्तित्वात असून, संपूर्ण देशात उद्भवलेल्या पक्षी व प्राण्यांवरील आजाराचा प्रतिबंध करण्यासाठी या प्रयोगशाळेची मदत घेतली जाते. महाराष्ट्रात मात्र कुठेही अशा प्रकारची लॅब उपलब्ध नाही. परभणी येथे कृषी विद्यापीठ तसेच पशु वैद्यकीय महाविद्यालय उपलब्ध आहे. त्यामुळे भाविष्यात बर्ड फ्लूसारख्या आजारांचा प्रतिबंध करण्यासाठी परभणी येथे हायसिक्युरिटी अ‍ॅनिमल डिसीज लॅब उभारण्याची गरज आहे.
'नुकसान भरपाई साठी मुख्यमंत्र्यांकडे पाठपुरावा करणार -
बर्ड फ्लू हा एच-५एन-१ इपीडेमिक विषाणू असून, यापासून मानवाला कोणताही धोका नाही. त्यामुळे पोल्ट्री फार्म चालकांनी घाबरून जाऊ नये. मात्र, बदलू मुळे मुरुंबा आणि परिसरातील पोल्ट्री चालकांच्या पोल्ट्रीमध्ये असलेल्या सर्व कोंबड्या नष्ट करण्याची प्रक्रिया शासनाकडून करण्यात येत आहे. यामुळे शेकडो शेतकरी आणि महिला बचत गटाच्या महिलांचे नुकसान होणार आहे. परंतु या विषाणूच्या प्रादुर्भावामुळे झालेल्या नुकसानीची भरपाई मिळवण्यासाठी मुख्यमंत्र्यांकडे पाठपुरावा करून त्यांना भरीव मदत करण्यात येईल, असेही आमदार डॉ.पाटील यांनी यावेळी सांगितले.
