परभणी - जिल्ह्यातील गंगाखेड-परळी रस्त्यावरील सोनपेठ हद्दीत ऑटो आणि ट्रकची समोरासमोर धडक झाली असून या अपघातात ऑटोतील चार व्यक्ती जागीच ठार झाले आहेत. ही घटना आज (रविवारी) संध्याकाळी आठ वाजण्याच्या सुमारास घडली. मृत चौघेही अंबाजोगाई येथील रहिवाशी आहेत.
सोनपेठ पोलीस ठाण्याच्या हद्दीतील करम पाटीजवळ आज (रविवारी) संध्याकाळी सात वाजण्याच्या सुमारास एक ऑटो चार जणांना घेऊन गंगाखेड-परळी रस्त्याने परळीकडे जात होता. ते सर्वजण गंगाखेड तालुक्यात लग्नासाठी आले होते. तेथून ते सर्व जण गावाकडे ऑटोने परत जात होते. करम पाटीजवळ समोरून भरधाव आलेल्या हायवा ट्रकने ऑटोला जोरदार धडक दिली. समोरासमोर झालेल्या या अपघातात ऑटोतील 4 जण जागीच ठार झाले. अपघात घडताच तेथील नागरिकांनी ऑटोतील सर्वाना तातडीने गंगाखेडच्या शासकीय उपजिल्हा रुग्णालयात दाखल केले. मात्र तत्पूर्वीच त्यांचा मृत्यू झाला.
मृत चौघेही अंबाजोगाईचे रहिवाशी
सदर ऑटोतील व्यक्ती सोनपेठ तालुक्यातील चुकार पिंपरी येथील विवाह सोहळा आटोपून गंगाखेड-परळी रस्त्याने परत परळीमार्गे अंबाजोगाईकडे निघाले होते. या ऑटोचा क्रमांक (एम.एच. 23 टी.आर. 311 ) असून तो परळीकडून राख घेऊन गंगाखेडकडे येत असलेल्या हायवा ट्रकला (एम.एच. 22 ए . एन . 5121 ) समोरासमोर धडकला. या अपघातात ऑटोचा चुराडा होऊन ऑटोतील विशाल बागवाले ( वय 20 ), दत्ता भागवत सोळंके ( वय 25 ), आकाश चौधरी ( वय 23 ), ऑटो चालक मुकुंद मस्के ( वय 22 ) ( सर्व रा. अंबाजोगाई ) हे चार तरुण जागीच ठार झाले आहेत.
हेही वाचा - परभणी: पेट्रोल दरवाढीच्या निषेधार्थ शिवसेनेचे आंदोलन; राज्यमंत्री दानवेंच्या वक्तव्याचा निषेध
हेही वाचा - परभणी : शाळा वाहनचालकांचे आर्थिक गणित बिघडले; मदतीची मागणी करत उपोषण
