पालघर 'अनलॉक' करा, आमदार क्षितीज ठाकूर यांची आरोग्यमंत्र्यांकडे मागणी

सरकारने कोरोनाच्या पॉझिटिव्हिटी रेटचा विचार करून शहरांची विभागणी चार स्तरांमध्ये केली आहे. त्यानुसार मुंबई, ठाणे आणि मीरा-भाईंदर ही शहरे दुसऱ्या स्तरात मोडतात. त्यामुळे येथे रात्री १० वाजतापर्यंत दुकाने उघडी राहू शकतात. पण शेजारीच असलेला पालघर जिल्हा मात्र तिसऱ्या स्तरात येतो. येथील दुकानदारांनाही रात्री १० वाजतापर्यंत दुकाने उघडी ठेवण्याची सूट द्यावी, अशी मागणी आमदार ठाकूर यांनी केली आहे.

वसई (पालघर) - कोरोना रुग्णांची दैनंदिन संख्या कमी होऊ लागल्यानंतर राज्यात अनेक ठिकाणी निर्बंध शिथिल केले आहेत. मुंबई आणि ठाणे जिल्ह्यांमध्ये अनलॉक प्रक्रिया सुरू झाली आहे. मात्र ही अनलॉक प्रक्रिया पालघर जिल्ह्यातही सुरू करावी, अशी मागणी बहुजन विकास आघाडीचे आमदार क्षितीज ठाकूर यांनी आरोग्यमंत्री राजेश टोपे यांच्याकडे केली आहे. ठाकूर यांच्या नेतृत्त्वाखालील शिष्टमंडळाने गुरुवारी आरोग्यमंत्र्यांची भेट घेतली. यावेळी ठाकूर यांनी लसींचा तुटवडा, वसईतील लोकांना लोकल प्रवासाची मुभा देण्यासंदर्भातील आदी मागण्यांवर चर्चा केली.

दुकानदारांना वेळेत सुट द्यावी -

सरकारने मुंबई आणि ठाणे जिल्ह्यातील दुकाने रात्री १० वाजतापर्यंत उघडी ठेवण्याची मुभा दिली आहे. सरकारने कोरोनाच्या पॉझिटिव्हिटी रेटचा विचार करून शहरांची विभागणी चार स्तरांमध्ये केली आहे. त्यानुसार मुंबई, ठाणे आणि मीरा-भाईंदर ही शहरे दुसऱ्या स्तरात मोडतात. त्यामुळे येथे रात्री १० वाजतापर्यंत दुकाने उघडी राहू शकतात. पण शेजारीच असलेला पालघर जिल्हा मात्र तिसऱ्या स्तरात येतो. पण येथील दुकानदारांनाही रात्री १० वाजतापर्यंत दुकाने उघडी ठेवण्याची सूट द्यावी, अशी मागणी आमदार ठाकूर यांनी केली आहे.

वसई-विरार महापालिकेत पॉझिटीव्हिटी रेट २.०७ टक्के एवढा कमी आहे. गेली दोन वर्षं या भागातील व्यापारी, दुकानदारांचे व्यवसाय बंद असल्याने आर्थिक अडचणीत सापडले आहेत. या सर्वांच्या कुटुंबियांची परिस्थितीही बिकट आहे, अशी वस्तूस्थिती क्षितीज ठाकूर यांनी टोपे यांच्य पुढे मांडली.

हेही वाचा -'.... यापेक्षा गाणे गाण्याकडे लक्ष द्या'; रुपाली चाकणकरांचा अमृता फडणवीसांना सल्ला

23 लाखांपैकी फक्त १८,७०५ जणांना दोन्ही डोस -

आतापर्यंत तब्बल १,०२,९९२ लोकांना लस मिळाली असून त्यापैकी ८४,२८७ जणांना पहिलाच डोस मिळाला आहे. तर १८,७०५ जण मात्र दोन्ही डोस घेऊन सुरक्षित आहेत. मात्र वसई-विरार महापालिका क्षेत्रातील एकूण लोकसंख्या जवळपास २३ लाखांच्या आसपास आहे.

आरोग्यमंत्र्यांचा सकारात्मक प्रतिसाद -

आरोग्यमंत्री राजेश टोपे यांनी या मागण्यांना सकारात्मक प्रतिसाद दिला. या सर्व बाबीबाबत लवकरच तोडगा काढला जाईल, असे आश्वासनही त्यांनी दिले असल्याचे ठाकूर यांनी सांगितले. या शिष्टमंडळात माजी महापौर नारायणजी मानकर, प्रवीणजी शेट्टी, अजयभाई खोखानी आणि वसई तालुका हॉटेल असोसिएशन, वसई क्लॉथ जनरल व्यापारी असोसिएशन, वसई व्यापारी महासंघ, व इतर व्यापारी संघाचे प्रतिनिधी उपस्थित होते.

हेही वाचा - राज्यात ६ हजार ६९५ नव्या कोरोनाग्रस्तांची वाढ, १२० रुग्णांचा मृत्यू