रांची : महाराष्ट्राच्या पालघरमध्ये चोरी करुन पळालेल्या दोन चोरांना झारखंडच्या साहिबगंजमधून अटक करण्यात आली आहे. या चोरांकडून पोलिसांनी ३२५ ग्रॅम सोने, आणि साडेपाच लाख रुपयांची रोख रक्कम जप्त केली आहे. तसेच, अधिक तपास सुरू आहे.
पालघरमध्ये झाली होती चोरी..
याबाबत मिळालेल्या माहितीनुसार, पालघरच्या बोईसर पोलीस ठाण्याच्या हद्दीत एका सराफ दुकानात चोरी झाली होती. या चोरांचा शोध घेत महाराष्ट्र पोलीस थेट हरियाणापर्यंत पोहोचले. त्याठिकाणी राजमहल एसडीपीओच्या मदतीने राधानगर पोलीस ठाण्याच्या हद्दीत येणाऱ्या पियारपूर गावात पोलिसांनी छापेमारी केली. यामध्ये दोन चोरांना अटक करण्यात पोलिसांना यश आले.
इतर आरोपींनाही होणार लवकरच अटक..
पोलीस अधीक्षक अनुरंजन किस्पोट्टा यांनी सांगितले, की या चोरांकडून ३२५ ग्रॅम सोने आणि साडेपाच लाख रुपयांची रोख रक्कम जप्त करण्यात आली आहे. चौकशीदरम्यान या दोघांनी सांगितले, की चोरीमध्ये आणखी काही आरोपींचा समावेश होता. या सर्वांनाही लवकरच अटक करण्यात येईल, असे त्यांनी स्पष्ट केले. तसेच, आज अटक करण्यात आलेल्या आरोपींना महाराष्ट्र पोलीस आपल्या सोबत घेऊन जाणार असल्याचेही त्यांनी सांगितले.
हेही वाचा : निवृत्त सैनिकाला हेरगिरीच्या आरोपाखाली अटक; उत्तर प्रदेश एटीएसची कारवाई
