पालघर (तलासरी) - कोरोनाच्या पार्श्वभूमीवर सध्या शाळा बंद आहे. यामुळे ऑनलाइन वर्ग भरविण्याचा निर्णय सरकारने घेतला आहे. मात्र, अनेक ठिकाणचे विद्यार्थी या ऑनलाइन शिक्षणापासून वंचित राहत आहेत. यामुळे तलासरी तालुक्यातील सुत्रकार गावातील महाराष्ट्र विद्या मंदिर येथील शिक्षक विवेकानंद देसले यांनी ऑनलाइन शिक्षणापासून वंचित असलेल्या विद्यार्थ्यांना कोरोनाचे सर्व नियम पाळत शेतातच शैक्षणिक धडे देत आहेत.
आदिवासी, दुर्गम भागातील विद्यार्थी ऑनलाइन शिक्षणापासून वंचित
विवेकानंद देसले यांनी सर्व प्रथम पाड्यांवर भेटी देऊन विद्यार्थ्यांचे फोननंबर तसेच व्हॉट्सऍप नंबर घेऊन त्याद्वारे विद्यार्थ्यांना अभ्यास घेऊन त्यांना शिकवण्याचा प्रयत्न केला. पण, पालघर जिल्ह्यासारख्या आदिवासीबहुल ग्रामीण भागात मोबाईल नेटवर्क, इंटरनेट, पालकांकडे अ‌ॅण्ड्रॉइड मोबाइल, लॅपटॉप नसल्याने ऑनलाइन शिक्षण आदिवासी मुलांपर्यंत पोहोचविणे कठीण असल्याचे देसले यांच्या लक्षात आले. त्यानंतर त्यांनी स्वतः लिहून तयार केलेल्या स्वाध्याय पुस्तिकेच्या झेरॉक्स प्रती मुलांना दिल्या. पण, काहीच न शिकवता मुलांना स्वाध्याय सोडवण्यास अडचणी येत होत्या.
शेतात विद्यार्थ्यांना शिक्षण
विवेकानंद देसले यांनी सुत्रकार येथे गावातील एका शेतातच ऑनलाइन शिक्षणापासून वंचित असलेल्या विद्यार्थ्यांना शिक्षण देण्याचे ठरविले. त्यानुसार सूत्रकार गावातील एका शेतात सोशल सोशल डिस्टन्सिंग व कोरोना विषयीचे नियम पाळत 10-15 विद्यार्थ्यांचे गट तयार केले. त्यानंतर त्यांनी विद्यार्थ्यांना शेतातच शिक्षण देण्यास सुरुवात केली आहे. याचा बराच फायदा विद्यार्थ्यांना होत आहे. पालक वर्गाचासुध्दा या उपक्रमाला पाठिंबा मिळाला असून सुत्रकार येथील शाळेचे मुख्याध्यापक सखाराम थापड हेही देसले यांना सहकार्य करत आहेत.
हेही वाचा - मराठा समाजाला 'ओबीसी'तून आरक्षण देऊ नये, विविध मागण्यांसाठी पालघरमध्ये आंदोलन
