पालघर - केंद्रीय मंत्री रावसाहेब दानवे यांनी दिल्लीतील शेतकरी आंदोलनासंदर्भात दोन दिवसांपूर्वी आक्षेपार्ह वक्तव्य केले होते. या वक्तव्याचा पालघरमध्ये शिवसैनिकांनी निषेध करत आंदोलन केले. शिवसैनिकांनी पालघर येथील हुतात्मा चौक येथे रावसाहेब दानवे व केंद्र सरकार विरोधात घोषणा देत त्यांचा निषेध व्यक्त केला. दानवे यांनी मंत्रिपदाचा राजीनामा द्यावा व केंद्र सरकारने शेतकऱ्यांच्या मागण्या मान्य कराव्यात, अशी मागणी यावेळी आंदोलक शिवसैनिकांनी केली आहे.
काय होते दानवेंचे वक्तव्य-
केंद्रीय मंत्री रावसाहेब दानवे यांनी काही दिवसांपूर्वी औरंगाबाद जिल्ह्यातील एका गावात आरोग्य केंद्राचे उद्घाटन करताना दिल्लीतील शेतकरी आंदोलनाविषयी आक्षेपार्ह वक्तव्य केले होते. या आंदोलनात शेतकरी नसून दुसरेच लोक आहेत. पाकिस्तान आणि चीनकडून या आंदोलनाला पाठिंबा दिला जात आहे, असे दानवे म्हणाले होते. दानवे यांच्या या वक्तव्यानंतर राज्यभरात संतप्त प्रतिक्रिया उमटत असून त्यांचा निषेध केला जात आहे.
दानवेंविरोधात शिवसेनेचे निषेध आंदोलन-
रावसाहेब दानवे यांनी शेतकऱ्यांबाबत केलेला आक्षेपार्ह विधानामुळे राज्यभर त्याचे प्रतिसाद उमटत आहेत. रावसाहेब दानवे यांच्या विरोधात आज पालघर येथील शिवसेना आक्रमक झाल्याचे पाहायला मिळाले. हुतात्मा चौकात शिवसैनिकांनी रावसाहेब दानवे व केंद्र सरकार विरोधात जोरदार घोषणाबाजी केली. रावसाहेब दानवे यांनी राजीनामा द्यावा अशी मागणी यावेळी शिवसैनिकांनी केली.
हेही वाचा- शरद पवार यांची तपश्चर्या आणि साधना देशाला पुढे घेऊन जाणारी - जयंत पाटील
हेही वाचा-शेतकरी आंदोलन आणखी तीव्र, १४ डिसेंबराला सर्व शेतकरी नेते बसणार उपोषणाला
