पालघरमध्ये नगरसेवकांचा जिल्हा आरोग्य अधिकाऱ्यांना घेराव

पालघर नगरपरिषद हद्दीत भगिनी समाज शाळा येथे जिल्हा आरोग्य विभागामार्फत फक्त एकच लसीकरण केंद्र सुरू आहे. मात्र याठिकाणी थोड्या प्रमाणातच लस उपलब्ध होत असल्याने नागरिक या लसीकरण केंद्रावर मध्यरात्रीपासूनच रांगा लावत असल्याचे पाहायाला मिळत आहे.

पालघर - पालघर नगरपरिषदेच्या बंद असलेल्या आठ लसीकरण केंद्रावर नागरिकांचे लसीकरण पुन्हा सुरू करण्याच्या मागणीसाठी नगरसेवकांनी जिल्हा आरोग्य अधिकार्‍यांना घेराव घालत आंदोलन केले. पालघर नगरपरिषद हद्दीत भगिनी समाज शाळा येथे जिल्हा आरोग्य विभागामार्फत फक्त एकच लसीकरण केंद्र सुरू आहे. मात्र याठिकाणी थोड्या प्रमाणातच लस उपलब्ध होत असल्याने नागरिक या लसीकरण केंद्रावर मध्यरात्रीपासूनच रांगा लावत असल्याचे पाहायाला मिळत आहे. लसीकरणासाठी नागरिकांना मोठी खटाटोप करावी लागत असून त्रासही सहन करावा लागत असल्याचे नागरिकांचे मत आहे.

पालघर नगरपरिषद हद्दीतील नागरिकांचे लसीकरण व्हावे यासाठी नगरपरिषदेमार्फत नगरपरिषद हद्दीत 8 लसीकरण केंद्रे सुरू करण्यात आली होती. मात्र ही लसीकरण केंद्र गेल्या अनेक दिवसांपासून बंदच असल्याने नागरिकांच्या रोषाचा सामना या नगरसेवकांना करावा लागत आहे. नागरिकांचा रोष पत्करावा लागत असल्यामुळे पालघर नगरपरिषदेच्या नगरसेवकांनी जिल्हा आरोग्य अधिकाऱ्यांना घेराव घातला. लसीकरण केंद्रांवर लस उपलब्ध करून नागरिकांचे लसीकरण सुरू करावे, अशी मागणी आरोग्य अधिकार्‍यांकडे करण्यात आली आहे.