पालघर - अवघ्या दोन दिवसांवर गणेशोत्सव आला असला तरी पालघर शहरातील रस्त्यांची दुरवस्था जैसे थे आहे. गणेशोत्सवापूर्वी शहरातील रस्ते पूर्ववत होतील, असा गणेशभक्तांना विश्वास वाटत होता. मात्र, असे काही झाले नाही व खड्ड्यांतून गणपतीचे आगमण करण्याची वेळ गणेश भक्तांवर आली आहे.
हेही वाचा - 'बॉर्डरचा बाप्पा' काश्मीरवासीयांसोबत मुंबईतून रवाना
गणेशोत्सव जवळ आल्याने सर्वत्र आनंदाचे वातावरण पसरले आहे. सर्वच गणेश मंडळांमध्ये व घरोघरी बाप्पांच्या आगमनाची तयारी सुरू झाली आहे. मात्र, पालघर शहरातील विविध ठिकाणी रस्त्यांची दुरवस्था झालेली आहे. काही ठिकाणी तर रस्त्यांची चाळण झालेली आहे. नगरपरिषद प्रशासन व सार्वजनिक बांधकाम विभागाने रस्त्यांची डागडुजी केलेली नाही. यामुळे गणेशाच्या आगमनात खड्यांचे विघ्न येणार असेच चित्र सध्या रस्त्याच्या दुरवस्थेवरून स्पष्ट होत आहे.
हेही वाचा - महापुराचे भान ठेवून गणेशोत्सव साजरा करणार; पुण्यातील गणेश मंडळांची भूमिका
शहरांमधील जुना पालघर रस्ता, टेंभोडे रस्त्यावरील धडा हॉस्पिटल समोरच्या रस्त्याची दुरवस्था, पालघर-माहीम रस्ता तसेच पालघर परिसरात अनेक ठिकाणी रस्त्यांची दुरवस्था झालेली आहे. याठिकाणी रस्त्याची अक्षरशः चाळण झाल्याचे चित्र आहे. गणेश मंडळांना हे रस्ते प्रशासन दुरुस्त करतील अशी अपेक्षा असताना आजतागायत या रस्त्यांची दयनीय अवस्था दिसून येत असल्याने येत्या गणेश मिरवणूकीत खड्ड्यांचे विघ्न येणार की काय असा प्रश्न गणेश भक्तांना पडत आहे.
हेही वाचा - मुंबईत गणेशोत्सव मंडळाच्या मंडपात आढळला 'अजगर'
