पालघर - डहाणू तालुक्यातील माटगाव परिसरात 18 गायींसह 2 बैलांचा संशयास्पद मृत्यू झाल्याची घटना घडली आहे. मृत्यूचे कारण अद्याप अस्पष्ट आहे. शवविच्छेदन अहवालानंतर कारण स्पष्ट होईल, अशी माहिती पोलीस प्रशासनाकडून देण्यात आली आहे.
जनावरांच्या अचानक झालेल्या मृत्यूमुळे परिसरात एकच खळबळ उडाली. घटनेची माहिती मिळताच वाणगाव पोलीस आणि डहाणू पशुवैद्यकीय अधिकारी घटनास्थळी दाखल झाले होते. माटगाव परिसरात मोठ्या प्रमाणावर भाजीपाल्याची लागवड केली जाते. कीटकनाशके फवारण्यात आलेला भाजीपाला खाल्ल्यामुळे ही जनावरे मरण पावली असल्याचा अंदाज व्यक्त केला जात आहे. याशिवाय, जनावरांमुळे होणाऱ्या नुकसानीला कंटाळून एखाद्या शेतकऱ्याने जाणीवपूर्वक विषप्रयोग करून जनावरांची हत्या केल्याची शक्यतादेखील वर्तवली जात आहे.
हेही वाचा - आंध्र प्रदेश : गौशाळेमध्ये 100 गायी आढळल्या मृत अवस्थेत, विषबाधा झाल्याचा संशय
दरम्यान, शेतकऱ्यांनी काही दिवस आपल्या जनावरांना चरायला न सोडता त्यांना गोठ्यातच चारा देण्याचा सल्ला पशुवैद्यकीय अधिकाऱयांनी दिला आहे. तसेच, जनावरांची प्रकृती बिघडल्यास त्वरीत संपर्क करण्याचे आवाहनही त्यांनी केले आहे.
