उस्मानाबाद- मी शरद पवारांसारखा फक्त बोंबलत फिरत नाही, तर काम करून दाखवतो, असे म्हणत आज उद्धव ठाकरे यांनी शरद पवार आणि काँग्रेसवरती सडकून टीका केली. विमा प्रश्न असो किंवा शेतकऱ्यांच्या मदतीसाठीचा प्रश्न असो, आम्ही तो सोडवतो आणि फक्त यासाठीच सत्तेत राहतो. तुम्ही आम्हाला नाव ठेवले तरी शेतकऱ्यांसाठी आम्ही सत्तेत राहिलो असल्याचे सांगत ठाकरे यांनी शरद पवार व काँग्रेस वरती जोरदार टीका केली.
उद्धव ठाकरे आज महायुतीचे उमेदवार कैलास पाटील यांच्या प्रचारासाठी उस्मानाबाद येथे आले होते. यावेळी त्यांनी पवारांसह काँग्रेसवरती सडकून टीका केली. त्याचबरोबर शिवसेनेच्या जाहीरनाम्याचा उल्लेख करत आम्ही आमच्या वचन नाम्यात एक रुपयात आरोग्य तपासणी करणार आहोत, यावर शरद पवार यांनी टीका केली होती. याला प्रत्युत्तर देत तुम्ही या. तुमच्या डोक्यापासून ते पायापर्यंत तुमची तपासणी करू, असा खोचक टोलाही उद्धव ठाकरे यांनी शरद पवार यांना लगावला. यावेळी महायुतीचे उमेदवार ज्ञानराज चौगुले, कैलास पाटील त्याचबरोबर विद्यमान खासदार ओमप्रकाश राजेनिंबाळकर उपस्थित होते.
हेही वाचा- काँग्रेसने आमचा जाहीरनामा चोरला; प्रकाश आंबेडकरांचा आरोप
अजित पवार यांच्यावर टीका करताना उद्धव ठाकरे म्हणाले की, बाळासाहेबांच्या अटकेचे आदेश देणे ही आमची चूक होती. तेव्हाचे विभाग प्रमुख ऐकत नव्हते, असे अजित पवार म्हणत आहेत. मग तुमच्या विमानाचे पायलट शरद पवार तेव्हा काय करत होते, असा सवाल उद्धव ठाकरे यांनी अजित पवार यांना केला आहे. कोर्टाने तुमच्या पेकाटात लाथ घातली म्हणून तुम्ही वाचले, नाही तर राज्यभर आगडोंब उसळला असता आणि त्यात तुम्ही खाक झाले असते. ही जर तुम्हाला आता चूक वाटत असेल तर तुम्ही महाराष्ट्राची माफी मागावी, असे म्हणत सुडाच्या राजकारणाची सुरुवात तुम्हीच केली, असा आरोप उद्धव ठाकरे यांनी अजित पवार यांच्यावर लावला.
हेही वाचा- बंडखोरांचे गळ्यात-गळे, तर महायुती आणि आघाडी अजूनही वेगवेगळे
