उस्मानाबाद - उस्मानाबाद जिल्ह्यातील तुळजाभवानी मंदिर संस्थान व तुळजाभवानी देवीच्या नावाने बोगस वेबसाईट काढून भाविकांची फसवणूक करणाऱ्या एका वेबसाईटचे नाव पुढे आले होते. पण, आता नवीन माहिती समोर आली असून इतर आणखीन 4 वेबसाईटच्या माध्यमातून देखील भाविकांची फसवणूक केली असल्याचे तक्रार मंदिर संस्थानकडून देण्यात आलेली आहे. याबाबत तुळजापूर पोलीस ठाण्यात गुन्हा दाखल झाला आहे. बनावट वेबसाईटवरून भाविकांची फसवणूक होत असल्याची माहिती, एका माहिती अधिकार कार्यकर्त्याने उघडकीस आणली आहे. या प्रकरणामुळे उस्मानाबाद जिल्हा प्रशासन हादरले आहे.
भाविकांची ऑनलाइन फसवणूक
विविध पूजा करण्याच्या नावाने आर्थिक फसवणूक करणाऱ्या इतर चार अज्ञात वेबसाईटच्या चालकांवर तुळजापूर पोलीस ठाण्यात गुन्हा नोंद करण्यात आला आहे. तुळजाभवानी मंदिराला देशातील भाविक दर्शनासाठी येतात. ज्यांना येणे शक्य नाही असे भाविक ऑनलाइन रक्कम पूजा आणि प्रसादासाठी देतात. पण, भाविकांची फसवणूक करण्यासाठी बनावट वेबसाईट तयार करून रकमा घेतल्या आहेत. प्रकरण गंभीर असल्याने जिल्हाधिकारी कौस्तुभ दिवेगावकर यांच्या आदेशानुसार मंदिर संस्थानचे सहायक व्यवस्थापक अनिल चव्हाण यांनी दिलेल्या तक्रारीवरून गुन्हा नोंद करण्यात आला आहे.
माहिती अधिकारातून बनावट वेबसाईटचा पर्दाफाश
माहिती अधिकार कार्यकर्ते बाळासाहेब सुभेदार यांनी बनावट वेबसाईटची माहिती समोर आणली होती. जिल्हाधिकारी दिघेगावकर यांच्याकडे एका बनावट वेबसाइटच्या विरोधात तक्रार दिली होती. चौकशी केल्यानंतर आणखीन चार बनावट वेबसाईटच्या सहायाने भवानी मातेच्या भाविकांची आर्थिक लूट केली जात असल्याचा धक्कादायक प्रकार उघडकीस आला. जिल्हाधिकारी दिवेगावकर यांनी चौकशी व कारवाई करण्याचे आदेश दिले होते. त्यानुसार मंदिर संस्थानचे विद्युत सहायक व्यवस्थापक अनिल चव्हाण यांच्या तक्रारीनुसार तुळजापूर पोलीस ठाण्यात तक्रार देण्यात आली आहे.
या चार वेबसाइटवरुन होत होती फसवणूक
जिल्हा प्रशासनाने बनावट वेबसाईटची माहिती देखील दिली आहे. www.tuljabhawanipujari.com, www.tuljabhwanimandir.org, www.shrituljabhavani.com, wwww.epuja.co.in या चार वेबसाइट सुरू करून भाविकांची लूट केली असल्याचे तक्रारीत नमूद केले आहे.
विशेष म्हणजे हा सर्व प्रकार नवरात्रोत्सवाच्या काळात राजरोस सुरू होता. तुळजापूर पोलीस ठाण्यात कलम 420, माहिती तंत्रज्ञान अधिनियम 2008 चे कलम 66 सी व डी नुसार गुन्हा नोंद करण्यात आला आहे.
हेही वाचा - तुळजाभवानीच्या प्राचीन अलंकारावर धार्मिक व्यवस्थापकानेच मारला डल्ला, नाईकवाडीला अटक
