उस्मानाबाद - लोहारा तालुक्यातील शिवकरवाडी येथे ट्रॅक्टर पलटी होवून अल्पवयीन मुलाचा जागीच मृत्यू झाला आहे. निळकंठ (सोन्या) शंकर जगताप असे या मुलाचे नाव आहे.
शिवकरवाडी शिवारात साठवण तलाव आहे. या तलावातील पाणी संपल्यामुळे येथील माती काढून येथीलच बाजूच्या शेतकऱ्याच्या शेतात टाकायचे काम सुरू होते. यावेळी अधिक माती भरलेले ट्रॅक्टर निलकंठ भरधावपणे चालवत होता. मात्र, अचानकपणे ट्रॅक्टरचे हेड पलटी झाले आणि त्यात ट्रॉलीच्या आणि हेडच्या मधे अडकल्याने त्याचा मृत्यू झाला.
महसूल विभागाच्या दुर्लक्षामुळे हा प्रकार घडल्याचे बोलले जात आहे. लोहारा परिसरात जेसीबीच्या साहाय्याने, असे खोदकाम करून मुरूम आणि माती वाहून नेण्याचे प्रकार वाढले आहेत. त्यामुळे, अशा जेसीबी चालकांवर, मालकांवर आणि ट्रॅक्टर मालकांवर कठोर कारवाई करण्याची गरज आहे.
