उस्मानाबाद - राज्यात पाऊस पडलेला नाही अशा भागात कृत्रीम पाऊस पाडण्याचा सरकारचा विचार आहे. तसेच सोलापूर, औरंगाबाद आणि नागपूर या ठिकाणी कृत्रीम पाऊस पाडण्याचे रडार सज्ज झाले असून येत्या २५ तारखेला पाऊस पाडण्याच्या दृष्टीने राज्य सरकार तयारी करीत असल्याचे भाजपचे नवनियुक्त प्रदेशाध्यक्ष चंद्रकांत पाटील म्हणाले. आज ते तुळजाभवानी येथे देवीचे दर्शन घेण्यासाठी आले होते. त्यावेळी ते बोलत होते.
राज्यात काही भागात पाऊस पडलेला आहे, तर काही भागात अद्यापही पाहिजे तसा पाऊस पडलेला नाही. त्यामुळे पेरण्या खोळंबल्या आहेत. विशेषतः मराठवाड्यात पावसाची स्थिती फार बिकट आहे. त्यामुळे राज्यात कृत्रिम पाऊस पाडताना मराठवाड्याला विशेष प्राधान्य देण्यात येईल, असे पाटील म्हणाले.
मराठा आरक्षण उच्च न्यायालयात टिकले आहे. मात्र, आता सर्वोच्च न्यायालयात ते टिकायला पाहिजे, अशी प्रार्थना त्यांनी यावेळी केली. तसेच बारामतीच्या जागेबद्दल बोलतना त्यांनी स्मृती इराणींचे उदाहरण दिले. ते म्हणाले, स्मृती इराणी आमच्या प्रेरणास्थान आहेत. पहिल्यांदा अमेठीमधून पराभूत झाल्या. मात्र, त्यांनी अमेठीत जाऊन परत नव्याने लढा दिला. त्यानंतर त्या विजयी झाल्या. त्याचप्रमाणे आम्ही बारामतीत लढा देत आहोत. मात्र, अद्याप तेथे यश आले नसले तरी २०२४ मध्ये बारामतीची जागा नक्की जिंकू, असा विश्वास पाटील यांनी व्यक्त केला.
उस्मानाबादेत भाजप प्रवेशासाठी तुफान गर्दी -
चंद्रकांत पाटील यांनी तुळजाभवानीचे दर्शन घेतल्यानंतर कार्यकर्ता मेळावा घेतला. यामध्ये चंद्रकांत पाटील यांच्या उपस्थितीमध्ये राष्ट्रवादीच्या तीन नगरसेवकांसह अनेक आजी-माजी पदाधिकाऱ्यांनी भाजपमध्ये प्रवेश केला. यावेळी भाजपमध्ये प्रवेश घेण्यासाठी अनेक कार्यकर्त्यांची झुंबड उडाली होती. मोठ्य़ा पुढाऱ्यांपासून तर गाव पातळीवरच्या पुढाऱ्यांनी देखील भाजप प्रवेशासाठी गर्दी केल्याने कार्यक्रमाच्या ठिकाणी काही काळ गोंधळाची परिस्थिती निर्माण झाली होती.
अनेकांनी भाजपमध्ये प्रवेश घेतला. मात्र, आता पक्षासाठी काम करावे, असे आवाहन चंद्रकांत पाटील यांनी कार्यकर्त्यांना केले.
