उस्मानाबाद - अयोध्येतील रामजन्मभूमी व बाबरी मशीद जमीन मालकीच्या वादाबाबत आज (शनिवार) सर्वोच्च न्यायालयाकडून निकाल देण्यात येणार आहे. या पार्श्‍वभूमीवर उस्मानाबाद जिल्ह्यात कोणत्याही प्रकारचा कायदा-सुव्यवस्थेचा प्रश्‍न उद्‌भवू नये, यादृष्टीने चोख बंदोबस्त ठेवण्यात आला आहे.
मागील अनेक वर्षांपासून न्यायालयीन प्रक्रियेत असलेल्या अयोध्येतील राम मंदिर बाबरी मशीदीच्या जमिनीच्या मालकी हक्काबाबत सुरू असलेल्या वादावरील सुनावणी आज पूर्ण होईल. या पार्श्वभूमीवरती जिल्ह्यात शांतता, सुरक्षितता रहावे व गोंधळ होऊ नये म्हणून शाळा, कॉलेज बंद ठेवण्यात आली आहेत.
शहरातील प्रत्येक चौकात तगडा पोलीस बंदोबस्त तैनात करण्यात आला आहे. त्याबरोबरच मंदिर, दर्गा या शेजारी पोलिसांचा फौजफाटा सुरक्षेसाठी तैनात करण्यात आला आहे. तत्पूर्वी जिल्हा पोलीस अधीक्षक यांच्याकडून शांतता बैठकीचे आयोजन करण्यात आले होते.
आजच्या निकाल संदर्भात सुरक्षेसाठी जिल्हा पोलीस दलातील दोन हजार कर्मचारी आहेत. राज्य राखीव दलाची तुकडी, होमगार्डना ९०० जवान तसेच पोलीस अधीक्षक यांच्यापासून ते उपनिरीक्षकापर्यंत असा अधिकाऱ्यांचा मोठा ताफा सज्ज ठेवण्यात आला आहे.
