नाशिक - इंग्लंडची राजधानी लंडन शहरात आजपासून 'वर्ल्ड ट्रेड मार्क प्रदर्शना'ला सुरूवात झाली असून या प्रदर्शनात महाराष्ट्राच्या पर्यटन विभागानेदेखील सहभाग दर्शवला आहे. महाराष्ट्रातील विविध पर्यटनस्थळाची माहिती जगभरातील पर्यटन व्यावसायिकांसह, हौशी पर्यटक, पत्रकार, अभ्यासक आणि अधिकाऱ्यांच्या पसंतीस उतरत आहे.
आज महाराष्ट्र महाराष्ट्र पर्यटन स्टॉलचे उद्घाटन केंद्रीय पर्यटन सचिव योगेंद्र त्रिपाठी यांच्या हस्ते करण्यात आले. यावेळी राज्याचे पर्यटन सचिव विनिता सिंगल पर्यटन, उपसंचालक रामदास खेडकर आदी मान्यवर उपस्थित होते.
महाराष्ट्र पर्यटनाच्या स्टॉलमध्ये राज्याचा ऐतिहासिक वारसा सांगणारे गड-किल्ले, अजिंठा-वेरूळ, एलिफंटा आदी विविध ऐतिहासिक गुंफांचे वैभव, व्याघ्र पर्यटन (ताडोबा अभयारण्य), समुद्र किनारे, जंगले, कास पठारसारखी जगातील वारसास्थळे, तीर्थक्षेत्र, लोणावळा-महाबळेश्वर, चिखलदरा, माथेरान आणि थंड हवेची ठिकाणांच्या पर्यटनस्थळांची माहिती प्रदर्शनात देण्यात आली.
त्याशिवाय महाराष्ट्राची सांस्कृतिक वैभव, खाद्यसंस्कृती, बॉलीवूड चित्रनगरी, देशाची आर्थिक राजधानी असलेल्या मुंबईतील पर्यटन वैभव आदी माहितीही यावेळी देण्यात आली. महाराष्ट्र पर्यटनाचा आकर्षक स्टॉलची संकल्पना मेरकी कम्युनिकेशन्सने मांडत त्यांची बांधणी केली आहे.
राज्याच्या पर्यटन सचिव विनिता सिंघल यांनी सर्वांशी संवाद साधत महाराष्ट्राच्या पर्यटन विभागाची माहिती दिली. तसेच त्यांनी महाराष्ट्राला भेट द्या, असे आग्रहाचे निमंत्रण देखील यावेळी दिले. दरम्यान, या स्मार्ट प्रदर्शनात जगभरातील बहुतांशी सर्व देशांनी सहभाग घेतला असून आपल्या देशातील पर्यटन स्थळाची माहिती देऊन जगभरातील पर्यटक, अभ्यासक, व्यवसायिक आदींना आपल्या देशाकडे आकर्षित करण्याचा प्रयत्न याच्या माध्यमातून केला जातो.
महाराष्ट्रनेही यंदा या प्रदर्शनात सहभागी होत राज्यातील पर्यटन वैभवाचे द्वार जगभरातील पर्यटक व पर्यटन व्यावसायिकांना समोर खुले करून दिले आहेत.
