नाशिक - मुलगी अंध असल्याचा फायदा घेत जन्मदात्या बापानेच आपल्या अल्पवयीन मुलीवर अत्याचार केल्याची धक्कादायक घटना समोर आली आहे. याप्रकरणी नाशिकच्या ओझर पोलिसांनी नराधम बापास अटक केली आहे.
अल्पवयीन पीडित मुलगी दृष्टिहीन असून ती एका आश्रमशाळेत शिकत आहे. आश्रम शाळेच्या नियमानुसार दरवर्षी प्रत्येक विद्यार्थ्यांची वैद्यकीय तपासणी केली जाते. याच वैद्यकीय तपासणीत ही तरुणी दोन महिन्यांची गर्भवती असल्याचे निष्पन्न झाले.
यावेळी संबंधित शिक्षकांनी या पिडीत मुलीला विश्वासात घेऊन तिची चौकशी केली असता तिने जन्मदात्या बापानेच अत्याचार केल्याची माहिती शिक्षकांना दिली. त्यानंतर शिक्षकांनी याप्रकरणी नाशिकच्या ओझर पोलीस ठाण्यात गुन्हा दाखल केला आहे.
संबंधित शिक्षकांनी पीडितेला मालेगाव कॅम्प पोलीस ठाण्यात घेऊन जात तिथे फिर्याद दाखल केली. परंतु, हा प्रकार ओझर पोलीस ठाण्याच्या अखत्यारित घडल्यामुळे मालेगाव कॅम्प पोलिसांनी हा गुन्हा ओझर पोलीस ठाण्याकडे वर्ग केला. आपल्या विरूध्द फिर्याद दाखल झाल्याचे समजताच हा नराधम बाप पळून जाण्याच्या तयारीत असताना ओझर पोलिसांनी त्याच्या मुसक्या आवळल्या.
पीडितेच्या फिर्यादीवरून या नराधम बापाविरुद्ध भादंवि कलम ३७६ बाललैंगिक अत्याचार कलम ५ जे १,२,६ प्रमाणे गुन्हा दाखल करण्यात आला आहे. अधिक तपास पोलीस निरीक्षक भगवान मथुरे यांच्या मार्गदर्शनाखाली ओझर पोलीस करीत आहेत.
